İran İlbaşı Mäsud Pezeşkiyan Amerika Quşma Ştatları häm İzrailneñ ilenä qarşı alıp barğan suğışnı tuqtatunıñ berdänber yulınıñ Tährannıñ "legal xoquqlarınıñ" tanıluı häm "kiläçäktä barlıqqa kilä alaçaq agressiyägä” qarşı nıq xalıqara garantiyälär birelüe buluın äytte.

Pezeşkiyan çärşämbe könne “X" akkauntınnan urtaqlaşqan yazmasında Rusiyä häm Paqıstan liderları belän söyläşüen belderep: "İrannıñ töbäktä tınıçlıqqa bulğan tuğrılığın qabat raslıym. Sionist rejim häm AQŞ tarafınnan başlatılğan bu suğışnı beterüneñ berdänber yulı İrannıñ legal xoquqlarınıñ tanıluı, kompensaśiyä tülänüe häm kiläçäktä buluı mömkin agressiyägä qarşı nıq xalıqara garantiyälär”, - dip yazdı.

İzrail häm AQŞnıñ 28nçe fevraldä İranğa qarşı başlatqan urtaq höcümnän soñ regional kiyerenkeleklär şaqtıy arttı. İran räsmilärenä kürä, bu höcümnärdä xäzergä qädär İrannıñ êlekke dini liderı Äli Xamänäy belän bergä 1 meñ 300dän kübräk keşe ülgän häm 10 meñnän artıq keşe yaralanğan.

Tähran İzrailgä Ürdün (İordaniyä), Ğiraq häm AQŞ xärbi kontingentları urnaşqan Farsı qultığı illärenä keşesez hawa apparatları häm raketa höcümnäre belän cawap birde.

İran monnan tış dönya nefteneñ yaqınça 20%ın dönya bazarlarına citkergän bik möhim Ormuz buğazın da ğämäli bularaq yabıp quydı.

AQŞ bazalarına kiterelgän zıyan

“New York Times”nıñ çärşämbe könne bastırğan analizına qarağanda, Yaqın Könçığıştağı kim digändä 17 AQŞ xärbi, diplomatik häm hawa saqlanu qorılması İrannıñ keşesez hawa apparatı häm raketa höcümnäre arqasında zıyan kürde.

Zıyan kürgän qorılmalarnıñ kim digändä 11eneñ xärbi baza yäki qorılma buluı häm bu qorılmalarnıñ töbäktäge böten amerikan kontingentınıñ yartısı diyärlek buluı belderelde.

Hawa saqlanu sistemaları iñ çığımlı yuğaltular arasında urın aldı. İyärçen räsemnäre Qatarnıñ Umm Dahal şähäre yanında urnaşqan häm 4.800 çaqrım yarım radiusına iyä aktivlıq töbägen buldıru öçen proyektlanğan 1,1 milliard dollarlıq irtä kisätü radarına zıyan kiterelüen kürsätä.

Analizğa qarağanda, İran şulay uq THAAD dip atalğan Terminal yuğarı biyekle mäydan saqlanu sisteması komponentlarına da höcüm itkän.

Kongress wäkilenä sıltama belän “New York Times” gazetı xäbär itkänçä, Pentagon 28nçe fevraldä Baxreyndağı AQŞ xärbi diñgez flotınıñ bişençe flot ştab-fatirına kiterelgän zıyannı yaqınça 200 million dollar dip bäyälägän.

İran, monnan tış AQŞ diplomatik qorılmaların da nişan itep alıp, Döbäydäge (Dubaidağı) AQŞ konsullığınıñ häm Quveyt şähäre belän Är-Riyadtağı ilçelekläreneñ waqıtlıça yabıluına säbäp buldı. Bu höcümnärdä yaralanuçılar bulmadı.

AQŞ räsmiläre “New York Times”qa höcümnärneñ İrannıñ bu suğışqa Tramp citäkçelegendäge şaqtıy keşeneñ farazlağanınnan tağın da kübräk äzerlekle buluın kürsätüen äytte.

‘”Cimerü suğışı”

İran inqilabı saqçıları AQŞ häm İzrail mänfäğätläre belän bäyläneşle buluı uylanılğan "iqtisad üzäklären häm banklarnı" nişan itep alaçaqların belderde. Bu xäl tağın da kübräk xalıqara firma xezmätkärläreneñ Döbäydän (Dubaidan) êvakuaśiyäsenä yul açtı.

İnqilap saqçıları särğaskäreneñ kiñäşçese Ali Fadavi däwlät televideniyäsenä birgän äñgämäsendä AQŞ häm İzrailneñ "böten amerikan iqtisadın häm dönya êkonomikasın yuq itäçäk ozaq waqıtlı cimerü suğışına kerü ixtimalın küzdä totularınıñ zarurlığın” äytte.

İran Farsı qultığındağı ike köymägä İran flotınıñ “kisätülären iğtibarsız qaldırıp” Ormuz buğazına kergännäre öçen höcüm itüen belderde.

İrannıñ yuğarı däräcäle xärbi kiñäşçese general-leytenant Yahya Rahim Safävi İrannıñ İzrailne yuqqa çığaruğa yünälgän ozaq waqıttan birle däwam itüçe yanawların qabatladı.