Böyekritaniya, AQŞ ilbaşı Donal’d Tramp räsmi vizitın tämamlağannan soñ, şuşı atna axırında Fälästin däwläten räsmi räweştä tanıyaçaq. “The i Paper” gazetınıñ xökümät çığanaqlarına nigezlängän xäbärenä qarağanda, şundıy qarar qabul iteläçäk.
İyül’ ayında prem’yer-ministr Keir Starmer Berläşkän Millätlär Oyışması ğomum şurasında sentyabr’ ayında Fälästin däwläten tanıyaçaqların, läkin İzrail Ğazzädäge gumanitar wäzğıyät’ne qaraw häm utnı tuqtatu turında kileşügä ireşü öçen möhüm adımnar yasamağan oçraqta bu qararnı ğamälgä quyaçaqların äytkän ide.
Xäbärgä qarağanda, bu belderüne Trampnıñ Angliyädän kitüennän soñğa qaldıru säbäbe – Tramp häm tışqı êşlär ministrı Marko Rubionıñ Ğazzädäge İzrail ciröste operaśiyäsenä yaqlaw kürsätülärennän soñ Vaşington belän kiyerenkelekne arttıru qurqınıçın buldırmaw.
Prem’yer - ministr süzçese bu tanunıñ ike däwlätle çişeleşne tormışqa aşıru mömkinlegen saqlap qalunı maqsat itep quyuın belderde.
“Däwlät bulu xaqı – Fälästin xalqınıñ xoquqı. Bu xoquqnı açıq räweştä belderüebez ike däwlätle çişeleşne tormışqa aşıru mömkinlegen saqlap qalu öçen bik möhim”, - dip östäde.
Uzğan yıl İrlandiya, Norvegiya häm İspaniya Fälästinne räsmi räweştä tanığan 147 däwlät arasına quşıldı.
Franśiya da Berläşkän Millätlär Oyışması ğomum şurasında Fälästin däwläten tanu plannarın açıqladı häm şulay itep G7 äğ’zası däwlätlär arasında monı êşlägän berençe il buldı. G7 – dön’yanıñ aldınğı sänäğat’ däwlätläre häm demokratíyälärennän torğan räsmi bulmağan forum.
