İran İlbaşı Mäsud Päzäşkian başqala Tähran su citmäw krizisına duçar bulırğa mömkin häm yaqın arada yawım-töşem bulmasa şähärne buşatırğa turı kilergä mömkin, dip kisätte.
Päzäşkian pänceşämbe könne İrannıñ könbatışında urnaşqan Sanandaj şähärenä säfäre waqıtında xökümät iqtisadi, êkologik häm ictimaği krizislarnı ber ük waqıtta çişärgä tırışa, dip belderde.
"Ätämad" cirle gazetı xäbär itkänçä, İran Däwlät başlığı bäyälärneñ yuğarı buluınıñ häm inflyaśiyäneñ êçke säyäsät xataları belän xalıqara sankśiyälär näticäse buluın anlattı.
“Yuğarı bäyälär häm inflyaśiyä öçen parlament ta, xökümät tä cawaplı. Tırışular bara, ämma çiklängän finans resurslar proyektlarnı tämamlarğa mömkinlek birmi”, - dip äytte ul.
Su krizisına kilgändä Päzäşkian İran tabigi awırlıqlar belän oçraşa, yağni yawım-töşem az häm su çığanaqları kimi bara, dip kisätte.
“Ägär yawım-töşem bulmasa, bez kiläse ayda Tähranda su belän tä'min itüne çikliy başlarğa mäcbür bulaçaqbız. Ägär qorılıq däwam itsä su betäçäk häm şähärne êvakuaśiyälärgä turı kiläçäk”, - dip belderde ul.
Su häm ênergiyä resursların yaxşıraq idarä itü häm saqlaw zarurlığına basım yasawçe İlbaşı Tährandağı wäzğiyätne “borçulı” dip bäyäläde.
Tähranda su krizisı
Tährannıñ su tä'minatı Lar, Mamlu, Amir Kabir, Taleqan häm Latyan kebek biş töp susaqlağıçqa bäyle, şular arasında iñ zurısı Amir Kabir.
Ämma soñğı biş yılda İran yawım-töşem külämeneñ kisken kimüe belän oçraştı häm meteorologik mäğlümatlar Tähranda bıyıl yawım-töşem külämeneñ sezon norması belän çağıştırğanda 40 %qa azraq buluın kürsätä.
Yawım-töşemneñ bigräk tä yaz häm cäy aylarında citmäwe susaqlağıçlar däräcäsen kisken kimette, bu isä öske häm cirastı su resurslarına tä'sir itte.
Tähran su idaräse 20nçe iyüldä başqalanı tä'min itüçe susaqlağıçlar soñğı ğasırnıñ iñ tübän däräcäsenä citte, dip kisätte.
Cäy aylarında waqıt-waqıt su özeklekläre inde kertelde. 3nçe noyabrdä Tähran su idaräse başlığı Bähzad Parsa, ägär qorılıq däwam itsä, susaqlağıçlar şähärne barı tik ike atnağa citärlek su belän tä'min itä alaçaq, dip belderde.
Päzäşkian 23nçe iyüldä ägär krizis xäzerge tizlektä däwam itsä häm näticäle çaralar kürelmäsä, xalıqnı su belän tä'min itü tizdän mömkin bulmayaçaq, dip kisätkän ide.
