Amerikadağı 7 törek oyışması AQŞ Kongressı äğzalarına Törkiyägä “F-35” xärbi oçqıçların satunı xuplarğa çaqırğan xat cibärde. “Yaqınça 75 yıl däwamında NATO berlektäşe, qurqınıçsızlıq häm diplomatik partner bularaq, Törkiyäneñ AQŞ saqlanu sistemalarına kerüen däwam itüe Amerikanıñ töp strategik mänfäğatlärenä xezmät itä, häm bez sezdän AQŞnıñ “F-35” suğış oçqıçların satunı xuplawığıznı häm bu xezmättäşlekkä kiräksez sanktsiyalärne häm kirtälärne beterüegezne xörmät belän sorıybız”,- diyelä xatta.
“Bu satularnı xuplaw - NATO berdämlegenä, töbäk totrıqlılığına, çın häm arta barğan ike yaqlı mönäsäbätlärgä investitsiya. Bez sezneñ yärdämegezne sorıybız häm bu mäsälä turında alğa taba fiker alışu mömkınlegen xuplıybız”, diyelä xatta.
Xatqa Törek Amerika Assotsiatsiyäläre Assambleyası, Törek Amerika Koalitsiyäse, Törek Amerika Assotsiatsiyäläre Federatsiyäse, Törek Amerika Milli İdarä Komiteti, “MUSIAD USA”, Könyaqnıñ Törek Amerika Säwdä Palatası häm “ASKON USA” oyışmaları qul quydı.
Törkemnär AQŞ-Törkiyä mönäsäbätläreneñ 1831 yılğa barıp totaşuın häm Änkaranıñ 1952 yılda NATOğa quşılğannan birle räsmi kileşü belän berlektäş buluın belderep ütä, “İttifaqnıñ könyaq-könçığış çigen nığıttı, Bosfor häm Dardanell buğazların kontroldä tottı”,- dip östädelär.
Xat iyul' ayında Kongressnıñ 50dän artıq äğzasına tapşırıldı.
AQŞ Törkiyäneñ Rusiyädän “S-400” hawa saqlanu sisteması satıp aluına qarşı buldı häm şul säbäple 2019 yılda“F-35” programmasınnan çığardı. AQŞ bu sistemanıñ suğış oçqıçlarına qurqınıç tudıraçağın häm NATO sistemaları belän turı kilmäwen belderde. Törkiyä ike sistema arasında bernindi qarşılıq yuqlığın qabat-qabat belderde häm bu mäsäläne tikşerü öçen komissiya uzdırırğa täqdim itte.
AQŞ ilbaşı Donald Tramp uzğan ayda Änkarada uzğan NATO sammitı qısalarında Törkiyä ilbaşı Räcäp Tayyip Ärdoğan belän oçraşu waqıtında “F-35” oçqıçların satıp alırğa röxsät itü mäsäläsen “hiçşiksez” qarap çığaçağın häm Törkiyägä salınğan CAATSA sanktsiyälären beterergä teläwen äytte.
