İlbaşı Donald Tramp Könyaq Koreya belän AQŞ arasında kiñkülämle iqtisadi häm saqlanu kileşüe tözelüe turında iğlan itte.

"Könyaq Koreya AQŞqa tariflarnı kimetüe öçen 350 milliard dollar tülärgä rizalaştı," dip belderde ul pänceşämbe könne üzeneñ “Truth Social” platformasında.

Monnan tış, ul Könyaq Koreyanıñ AQŞtan "zur külämdä" neft häm gaz satıp alırğa häm Könyaq Koreya şirkätläre häm êşquarları tarafınnan AQŞqa yasalaçaq investitsiyälärneñ 600 milliard dollardan artıp kitäçägen äytte.

"Beznen xärbi berläşmäbez moñarçı bulmağança nıq, häm şuña nigezlänep, min alarğa atom köçe belän êşläwçe su astı köymäse tözü röxsäten birdem, çönki alarnıñ xäzerge dizel köymäläre iske häm az xäräkätçän," dip östäde ul.

Tramp, çärşämbe könne Könyaq Koreyada ilbaşı Li Je-myön belän oçraşu waqıtında, Könyaq Koreya belän säwdä kileşüeneñ " tämamlanğan diyärlek" buluın, läkin soñğı kileşügä ireşelüen äytmäde.

Pänceşämbe könne soñraq Tramp Könyaq Koreyada Aziya-Tın okean iqtisadi xezmättäşlek (APEC) sammitında qatnaşuçı Qıtay liderı Si Sinpin belän oçraşır dip kötelä. Läkin Tramp bu regional cıyılışta qatnaşmayaçaq.