Ukraina räsmi zatları ilneñ könçığışındağı Bogoduxiv şähärenä yasalğan Rusiyä höcümendä dürt keşeneñ, şul isäptän, öç keçkenä balanıñ ğomere özelüen belderde. Töbäk xärbi idaräse başlığı Oleg Sinegubov mäğlümatlarına kürä, berär yaş’lek ike malay häm ike yaş’lek ber qız bala Rusiyä höcüme näticäsendä hälaq bulğan.

Sinegubov “Telegram” kanalında yazğança, balalar belän ber ük öydä bulğan 34 yaş’lek ir-at ta awır cäräxätlärdän ülgän. Yaralanğan 74 yaş’lek xatın-qızğa isä meditsina yärdäme kürsätelä. Sinegubov êlegräk yasağan belderüendä höcüm waqıtında 35 yaş’lek awırlı xatınnıñ da yaralanuın äytkän ide.

Bogoduxiv şähäre Xarkov töbägendä urnaşqan. Soñğı waqıtta Rusiyä qorallı köçläre bu töbäktäge transport häm ênergetika asqormasına höcümnären köçäytte.

Şul uq waqıtta, Rusiyäneñ kön’yağındağı Volgograd töbäge gubernatorı Andrey Boçarov çärşämbe tönlä bulğan dron höcüme näticäsendä sänäğat ob’yektı mäydanında yanğın çığuın belderde. Boçarov Telegramda: "Rusiyä saqlanu ministrlığınıñ hawa saqlanu berlekläre Volgograd töbägendäge ênergetika häm tınıç tormış asqormasına qarşı oyıştırılğan massaküläm terrorçı dron höcümen kire qağa," — dip yazdı.

Gubernatornıñ belderüenä kürä, höcüm näticäsendä toraq binadağı ber fatir zıyan kürgän häm dron qaldıqları balalar baqçası mäydanına töşkän. Älegä hälaq buluçılar turında mäğlümat yuq.