Comğa könne bastırılğan ber anketa näticälärenä qarağanda, Awrupa Berlegeneñ 7 ilendä soraştıruda qatnaşqan keşelärneñ yartısı AQŞ ilbaşı Donald Trampnı “Awrupanıñ doşmanı” bularaq kürä.

Tikşerü näticäläre buyınça, qatnaşuçılarnıñ 51 protsentı Trampnı “Awrupanıñ doşmanı” bularaq sıyfatlıy. Moña qarşı, yaqınça 8 protsentlıq öleş kenä Trampnı “Awrupanıñ dustı” dip sanıy. Frantsiyä, Bel’giya, Germaniya, İtaliya, İspaniya, Daniya häm Pol’şanıñ härbersendä meñnän artıq keşe belän ütkärelgän soraştıruda şundıy küreneş barlıqqa kilde.

Qatnaşuçılarnıñ 39 protsentı Trampnı “dus ta, doşman da tügel” dip sanıy. Soraştıru, AQŞ ilbaşınıñ Daniyağa bäyle avtonom töbäk bulğan Grenlandiyanı yawlap alu (qulğa töşerü) yanawlarınnan soñ, 13–19 ğıynwar könnärendä ütkärelä.

Daniyalılar Trampnı “doşman” bularaq kürüçelär arasında iñ alğı safta urın aldı. Alarnıñ 58 protsentı Trampnı Awrupanıñ doşmanı bularaq bäyäläde.

Cide ilneñ barısında da qatnaşuçılarnıñ 44 protsentı Trampnıñ “diktator şikelle qılanuın” äytsä, tağın 44 protsentlıq öleş AQŞ ilbaşınıñ “avtoritar omtılışlar” kürsätüen belderde.

Trampnıñ “demokratik printsiplarnı xörmät itüen” uylawçılarnıñ küläme isä barı tik 10 protsent.

Qayçandır AQŞ belän yaqın berlektäş bulğan Awrupa, Tramp däwerendä Vaşingtonnıñ torğan sayın tağın da doşmança qılanuına qarşı, açıq çiklär bilgeläwdä awırsındı. Trampnıñ Awrupanıñ suverenlığına qağıluçı süzläre dä bu borçılularnı tiränäytte.

Tramp bu atnada minerallarğa bay bulğan Grenlandiyanı köç qullanıp yawlap alu fikerennän kire çigensä dä, Awrupa illäre AQŞ liderınıñ çirattağı adımın sağayıp kötä.