“TRT World”ta êşläwçe irekle jurnalist Yaxya Barzaq İzrail hawa höcüme näticäsendä Ğazzä üzägendäge Deir al-Balah şähärendä häläk buldı.
Barzaq ber kafeda suğışnıñ tınıç xalıqqa täêsiren terkägän videoyazmaların yöklägän waqıtta ut astına êlägä.
Fälästin mäğlümat çaraları xäbär itkänçä, bu höcüm näticäsendä Barzaq belän bergä tağın biş keşe häläk bulğan.
Meditsina xezmätkärläre sişämbe könne İzrail höcümnäre näticäsendä, kim digändä, 58 fälästinle, şul isäptän ber awırlı xatın-qız häm balanıñ üterelüen citkerde.
Fälästin mäğlümat çaraları Deir al-Balahtağı höcümneñ ber ağac êşkärtü ostaxanäsen dä maqsat itep aluın xäbär itte.
Instagramdağı soñğı yazmalarında Barzaq, İzrail bombalawları häm köçläp küçerü yanawları arqasında, Ğazzä şähärennän kön’yaqqa qaçırğa mäcbür buluın yazğan.
“Gäwdäm kön’yaqqa küçerelde, läkin yörägem haman da Ğazzä şähärendä,” dip yazğan ul.
Törkiyä höcümne gäyepläde
Törkiyä iklbaşı apparatı êlemtä idaräse başlığı Borxanettin Duran Barzaqnı “okupatsiyä häm zolım külägäsendä xaqıyqätne êzläwçe batır tawış” dip atadı.
“Anıñ “TRT World”nıñ dokumental’ filmı ‘Ğazzä fotoräsemnäremdä” urın alğan xikäyäse dönyaga nilär bulğanın kürsätü öçen niqadär tırışuın kürsätte. Jurnalistlarğa höcümnär xakıyqätne yäşerä almıy” dip yazdı Duran qayğınamäsendä.
“TRT” ğomum mödire Zahid Sobacı höcümne kisken gäyepläde. Ul Barzaqnıñ üterelüen Ğazzädä jurnalistlarnıñ nindi qurqınıç şartlarda êşläwen tağın ber qat iskä töşerü dip atadı.
“Xezmättäşebez Yaxya Barzaqnı yuğaltu bezne qayğığa saldı. Ul bik awır şartlarda xäbär äzerli ide. İzrail jurnalistlarnı maqsat itep alıp, keşelekkä qarşı yasağan cinayätlären yäşerä almıy, cawap birü köne irtäme-soñmı kiläçäk,” dip belderde ul.
Barzaq Ğazzä şähärendä yaña tuğan balalar fotosurätläre belän tanıldı.
Suğışqa qadär anıñ “Instagram” bitläre balalar studiyäsendä töşerelgän matur fotosurätlär belän tulı bula. Läkin İzrail höcümnäre başlanğannan soñ, anıñ yazmaları ülem häm cimerelüne yaqtırta başlıy.
Ul, şulay uq, genotsid suğışında üterelgän balalar öçen qayğı beldergän videolar da urtaqlaştı.
Barzaq 2023 yılnıñ 7 oktyabrennän birle Ğazzädä üterelgän, kim digändä, 250 jurnalist häm media xezmätkäre arasında.
Fälästin häm xalıqara küzätüçelär mäğlümatlarına qarağanda, bu suğış zamança tarixta jurnalistlar öçen iñ xätärlärennän berse bulıp tora.
Fälästin mäğlümat çaraları anıñ üterelüen, İzrailneñ tınıç xalıq häm infrastrukturağa höcümnäre waqıtında Ğazzädä jurnalistlarnı nişanğa aluın däwam itüen kürsätä dip bäyäläde.
