İlbaşı Räcäp Täyyip Ärdoğan fälästinlelärgä qatğıy räweştä yärdäm itärgä süz birde häm İzrailneñ Ğazzägä qarşı höcümnären ğayepläp çığış yasadı.

Ärdoğan çärşämbe könne başqala Änkarada yaña tışqı êşlär ministrlığı binasına nigez salu tantanasında çığış yasap:
“Bez çit qullarnıñ Qodüsne pıçratuına röxsät birmibez. Bez möselmannar bularaq Könçığış Qodüstäge xoquqlarıbızdan kiregä ber adım da yasamıybız”,- dide.

İlbaşı Ärdoğan:
“Zolım, genośid, varvarlıq belän, ğayepsez balalarnıñ ğomeren özep üzlärenä imin kiläçäk tözibez dip uylawçılar tarixta bulğan başqa küplär kebek älbättä yuğaltaçaq, qoyğan qannarında üzläre bataçaqlar. Monnan qaçu da, qotılu da yuq”,– dip söyläde.

Ärdoğan Törkiyäneñ Süriyädän Yämängä, Livannan Qatarga qadär, İzrail banditlığınıñ maqsatında bulğan härkemgä teläktäşlek kürsätüne däwam itäçägenä basım yasap, Änkaranıñ Ğazzä däğ’wasına tuğrılığın assızıqladı.

İlbaşı:
“İzrailneñ ayawsız höcümnäre astında isän qalu öçen köräşkän Ğazzä xalqı yanında toruıbıznı berkem dä tuqtata almıy”, – dip belderde.

Ärdoğan şulay uq:

“Kiyerenkelektän köç aluçılar, töbägebezne qan külenä äyländerüçelär, geografiyäbezne totrıqsızlıqqa êtärüçelär qarşında tarixtağı kebek bügen dä, irtägä dä, inşalla nıq toraçaqbız”,- dide.