Filippinnarnıñ kön’yağındağı Basilan töbäge sulıqlarında 350dän artıq yulçı utırtqan parom batqan. Näticädä, kim digändä, 15 keşeneñ ğomere özelgän.
“GMA News Online” mäğlümatlarına qarağanda, 43 keşe haman yuğalğan dip sanala. "M/V Trisha Kerstin 3" dip ataluçı parom Sulu töbägendäge Jolo utrawına taba yul totqan. Yar buyı saqçıları cirle matbuğatqa 316 keşeneñ qotqarıluı häm êzläw-qotqaru êşçänlekläreneñ däwam itüe turında belderde.
Basilan utrawı gubernatorı Mujiv Xataman “Facebook” bitendä Mindanaonıñ İzabela portında töşerelgän videoyazmalar belän urtaqlaştı. Anda qotqarılğan keşelärneñ köymälärdän töşerelüe, qayberläreneñ cılı yurgannarğa törelüe, ä qayberläreneñ nosilkalar belän alıp kitelüen kürergä mömkin.
Xataman matbuğatqa birgän interv’yusında qotqarılğannarnıñ küpçelegeneñ xäle yaxşı buluın, läkin qayber ölkän yäştäge yulçılarğa aşığıç meditsina yärdäme kiräklegen äytte. Qotqaru êşläre bara, Xataman rämi zatlarnıñ yulçılar isemlegen tikşerüen däwam itülären belderde.
7 meñnän artıq utrawdan toruçı Filippinnarda diñgez iminlege mäs’äläse kilep tuğan qıyınlıqlar belän bilgele: bu ildä här yıl parom qazalarında küp sanda keşe hälaq bula.
