Kön’yaq - Könçığış Aziya däwlätläre berläşmäse (ASEAN) sammitı yäkşämbe könne Malayziyädä başlandı häm liderlar Könçığış Timornı 11 nçe äğ’za itep qabul itep, berlekneñ 26 yıldan soñ berençe kiñäyüen tormışqa aşırdılar.

47 nçe sammit sişämbe könenä qadär däwam itäçäk. Malayziya 1967 yıldan birle üz tarixında inde bişençe tapqır berlek räislegen üz östenä ala.

Kuala-Lumpur Kongres üzägendä ütkän açılış tantanasında liderlar Könçığış Timornıñ räsmi räweştä qabul itelüe öçen imza tantanasında qatnaştılar. Könçığış Timor 2011 yılda äğ’zalıq öçen möräcäğat’ itkän häm 2022 yılda küzätüçe statusı alğan ide.

1967 yılnıñ 8 avgustında Bangkokta tözelgän Kön’yaq - Könçığış Aziya däwlätläre berläşmäsenä (ASEAN) Bruney, Kambodja, İndoneziya, Laos, Malayziya, M’yanma, Filippin, Singapur, Tailand häm V’yetnam kerä.

Malayziya ilbaşı Änwär İbrahim ASEAN äğ’za däwlätläre liderlarınnan tış, AQŞ, Kön’yaq Afrika, Braziliya, Qıtay, Yaponiya, Kön’yaq Koreya häm başqa möhim partnyerlar liderların, yuğarı däräcäle wäkillärne “İnklyuzivlıq häm totırlılıq” temasına bağışlanğan sammitta qabul itä.  

AQŞ ilbaşı Donal’d Tramp ta sammitta qatnaşa häm Änwär İbrahim belän bergä iyül’ ayında qanlı çik bäreleşläre küzätelgän  Kambodja belän Tailand arasında tınıçlıq kileşüenä qul quyu tantanasında qatnaşaçaq.

2002 yılda Indoneziyädän bäysezlegen alğan Könçığış Timorda 1,3 million keşe yäşi.