Ukraina däwlät başlığı Volodimir Zelenskiy AQŞ ilbaşı Donald Trampka 90 milliard dollar külämendä qorallar isemlegen tapşıruın belderde.
"Bez AQŞ ilbaşına Ukraina öçen kiräkle barlıq äyberlärneñ isemlegen, detalları häm illüstratsiyäläre belän tapşırdıq," dip äytte ul Kiyevta uzğan matbuğat oçraşuında.
Zelenskiy “Tomahawk” qanatlı raketaların soraw turındağı xäbärlärgä qarata fikeren belderde häm qorallar alu turındağı taläpneñ AQŞtan suğış kiräk-yaraqları alu öçen tözelgän "zur kileşü"neñ ber öleşe buluın äytte.
Anıñ süzlärenä qarağanda, Kiyev başqa tör qorallar, şul isäptän, ozın arağa atuçı sistemalar öçen ayırım kileşülärgä dä qul quyarğa äzer.
Comğa könne Amerika matbuğatı, AQŞ häm Ukraina räsmiläre süzenä tayanıp, Trampnıñ Ukrainağa ozın arağa atuçı qorallar cibärü mömkinlege turında xäbär itte. Läkin AQŞ ilbaşı bu xaqta belderü yasamadı.
Ukrainada İzrail “Patriot”ları
Zelenskiy Ukrainağa ber aydan birle İzrailneñ “Patriot” sisteması qullanıluın häm közen tağın ike yaña sistema alınaçağı turında belderde.
Moñarçı İzrail Kiyevka hawa saqlanu sistemaların tapşıru turındağı xäbärlärne kire qaqtı.
"Ber İzrail kompleksi Ukrainada ber ay êşläp kilä. Bez közen tağın ike “Patriot” sistemasın alabız," dip äytte ul.
İyun ayında Rusiyä tışqı êşlär ministrlığınıñ wäkile Mariya Zaxarova İzrailneñ Ukrainağa “Patriot” sistemaların tapşıruın kire qağuçı räsmi añlatu aluların beldergän ide.
