Ênergetika häm tabiğıy resurslar ministrı Alparslan Bayraktar Soğud Ğaräbstanı belän zur masştablı qoyaş ênergetikası proektların üz êçenä aluçı yaqınça 2 milliard dollarlıq ênergetika investitsiyäse kileşüe imzalanuın belderde.
Bayraktar Soğud Ğaräbstanınıñ başqalası Riyadta wazıyfadaşı belän Törkiyä xökümäte häm Soğud Ğaräbstanı xökümäte arasında “Yañartıla torğan ênergetika stansiyäläre proektları turında” xökümätara kileşügä qul quyuların äytte.
Ênergetika häm tabiğıy resurslar ministrı Bayraktar Soğud şirkätläreneñ Törkiyädä tulayım 5000 megawatt quätle qoyaş häm cil ênergetikası stansiyälären töziyäçägen dä östäde.
Investitsiyäneñ berençe êtabında Sivas häm Karaman töbäklärendä tulayım 2000 megavatt quätle qoyaş ênergiyäse stansiyäse proektları tormışqa aşırılaçaq.
Bayraktar: "Törkiyädä bügengä qadär kürelgän iñ tübän bäyägä êlektr energiyäsen alaçaqbız. Bu 2 meñ megavatlıq berençe êtap proektı yaqınça 2 milliard dollarlıq investitsiyä digän süz. Bu, şul uq waqıtta, turıdan-turı tışqı finanslawnıñ ilebezgä kilüe dip añlatıla. Monıñ ber öleşe mondağı çığanaqlardan, ber öleşe isä xalıqara finans oyışmalarınnan täêmin iteläçäk," — dip söyläde.
Yaqınça 2 milliard dollarlıq investitsiyä belän tözeläçäk qoyaş ênergetikası stansiyäläreneñ yaqınça 2,1 million öyneñ êlektr ixtiyacın qanäğatländeräçägen beldergän Bayraktar, Törkiyäneñ investitsiyä moxitenä häm ênergetika tarmağına bulğan ışanıçın kürsätüçe bu proektlarnıñ ilbaşı Räcäp Tayyip Ärdoğannıñ 2035 yılğa qadär qoyaş häm cil ênergetikasında 120.000 megavatlıq quätkä ireşü maqsatı yulındağı iñ möhim adımnarnıñ bersen täşkil itüen äytte.
Bayraktar tözeleşneñ 2027 yılynda başlanuı kötelüen äytte. Berençe etapnıñ 2027 yıl soñına qadär tögällänüe, proektnıñ tulısınça isä 2028 häm 2029 yılda tämamlanuı planlaştırıla.
