İran AQŞtan Tährannıñ atom-töş programması buyınça söyläşülärdä İzrail yoğıntısınnan bäysez räweştä üz mänfäğatlären bäyäläwen söradı.

İran Yuğarı Milli İminlek şurası ğomum särqatibe Ali Laricani "Al Jazeera" kanalına birgän interv’yusında protsessnıñ däwam itüen häm töbäk illäreneñ dä söyläşülär uñışlı bulsın öçen tırışlıq quyuın belderde.

Laricani Oman tışqı êşlär ministrı Bädr bin Xämäd äl-Busaidi aşa Tährannıñ pozitsiyäse turında AQŞqa cibärelgän xatqa räsmi cawap alınmawın äytte.

Ul İrannıñ xezmättäşlekkä açıq qaluın häm söyläşülärne yaqlawnı däwam itterüen basım yasap belderde. Laricani İran atom-töş qoralına iyä tügel häm anı buldırırğa tırışmıy digän mäs’älädä Tähran belän Vaşington arasında urtaq fiker buluın äytte.

Protsessnıñ kiräksezgä ozınaytıluına qarşı çıqqan Laricani, İrannıñ raketa programması älege söyläşülärneñ ber öleşe bulmayaçağın belderde. "Raketa programmabız atom-töş programmasınnan tulısınça ayırım mäs’älä. Ul milli iminlegebez belän bäyle bulğan êçke êşebez. Şunıñ öçen bu söyläşülärneñ ber öleşe bula almıy," — dide ul.

Laricani, şulay uq, İrannıñ uran bayıtunı nulgä töşerü fikereneñ "kön tärtibendä bulmawın" äytte. "Bu texnologiyädä täcribä tuplağan ilneñ anı nulgä töşerüe mömkin tügel," — dip belderep, bayıtılğan urannıñ meditsina häm däwalaw maqsatları öçen kiräk buluın östäde.

İrannıñ yanawlarğa qarşı äzer buluın belderüçe Laricani, İzrailne söyläşülärgä tıqşınuda häm töbäktäge totrıqlılıqnı bozarğa tırışuda ğayepläde. "Söyläşülärebez tulısınça Amerika Quşma Ştatları belän alıp barıla. İzrail belän bernindi söyläşü ütkärmibez. Läkin İzrail bu protsessqa qıısıldı, anıñ niyäte — bu söyläşülärne qaqşatu häm bozu," — dide.

Laricani, şulay uq, regional' totrıqlılıqnı saqlaw öçen İrannıñ Soğud Ğaräbstanı, Misır häm Törkiyä belän xezmättäşlekkä äzer buluın äytte.