Berläşkän Millätlär oyışmasınıñ keşe xoquqların yaqlaw ofısı comğa könne açıqlağan yaña xisabına kürä dönyaküläm aldaw operaŝiyälärendä qıynaw, köçläw häm mäcbüri räweştä êşlätü oçraqları terkälgän.

BMOnıñ Keşe xoquqların yaqlaw yuğarı komissarı Volker Turk: "Bu zolımnar teträndergeç, şul uq waqıtta yöräkne telgäli," – diyep, xökümätlärne bu qadär zur keremle aldaw operaŝiyälärendäge korrupŝiya belän köräşergä häm alar artındağı cinayät çeltärlären xökem itärgä çaqırdı.

2021-2025 yıllar arasında urlanğan häm isän qalğan keşelär belän ütkärelgän söyläşülärgä tayanğan xisaptan kürengänçä qorbannarnı yalğan êş täqdimnäre belän aldağannar, annarı zolım astında onlayn aldaw sxemaların başqarırğa mäcbür itkännär.

Zolım arasında azıq-tölektän mäxrüm itü, mäcbüri abortlar, izolyaŝiya häm qıynawlar bar.

İyärçen yazmaları häm qır xisapları bu operaŝiyälärneñ yaqınça dürttän öç öleşeneñ Mekong töbägendä tuplanuın kürsätä, çeltärlärneñ Tın okean utrawları, Könyaq Aziä, Farsı qultığı illäre, Könbatış Afrika häm Amerika qıytğalarına taba kiñäyüen dä belderä.

İsän qaluçılar üz eçendä bäysez keçkenä şähärçeklärne xäterlätüçe, yaxşı saqlaw çaraları bulğan cirleklärdä totıluların añlattı.

Keşelärne aldap bulmaw ğadättä cäzalanu belän tögällängän. Ber Şri-Lankalı qorban äytüençä maqsatına ireşä almağan êşçelär säğätlär buyı "su törmäläre" bularaq bilgele bulğan su tankları êçenä quyılğan.

Qorbannar şulay uq ğailälärenä yünälgän şantaj taktikaları turında belderde. Yolım alu öçen alarğa zolım urın alğan video yazmalar cibärelgän.

Yuğarı komissar xoquqlarğa nigezlängän keşe satu belän köräş çaraları, ışanıçlı migraŝiya yulları häm cinayät çeltärlärenä mömkinlek birüçe korrupŝiyağa qarşı köçleräk xäräkät itärgä çaqırdı.