AQŞ suğış ministrı Pit Hegset şimbä könne yasağan belderüendä üzeneñ Qıtaydağı wazıyfadaşı Dong Jun belän xärbi êlemtä kanalları buldıru kiräklege turında kileşülären citkerde.
“Admiral Dong belän bez kilep çığarğa mömkin teläsä-qaysı problemanı çişü häm kiyerenkelekne kimetü öçen xärbi kanallar buldıru mäsäläsendä ber fikerdä. Bu turıda yaqın arada tağın oçraşular bulaçaq,” - dip yazdı Hegset “X” platformasında.
Ul tınıçlıq, totrıqlılıq häm yaxşı mönäsäbätlärneñ ike il öçen “iñ yaxşı yul” buluın assızıqladı.
“İlbaşı Tramp äytkänçä, anıñ tarixi 'G2 oçraşuı' AQŞ häm Qıtay öçen totrıqlı tınıçlıq häm uñışqa nigez saldı. Suğış ministrlığı da şul uq yuldan baraçaq — köç aşa tınıçlıq, üzara xörmät häm uñay mönäsäbätlär,” - dip östäde Hegset.
Dong belän Hegset comğa könne Malayziyä başqalası Kuala-Lumpurda Könçığış Aziyä illäre (ASEAN) saqlanu citäkçeläre sammitı qısalarında oçraştı.
AQŞ ilbaşı Donald Tramp ta pänceşämbe könne Könyaq Koreyanıñ Busan port şähärendä Qıtay citäkçese Si Szinpin belän oçraştı häm anı ul “G2” yäisä “İkele Törkem” dip atadı.
