Kiyev ölkäse gubernatorı Nikolay Kalaşnik başqaladan yıraq rayonğa oyıştırılğan Rusiya dron höcümendä 1 keşeneñ һälaq buluın, 11 keşeneñ yaralanuın xäbär itte.
Kalaşnik üzeneñ belderüendä doşmannıñ tağın ber dron höcüme buluın äytte häm qotqaruçılarnıñ küp qatlı ber yorttan keşelärne çığaruın, yanğın sünderü êşçänlekläreneñ däwam itüen citkerde.
Ul Telegramda bolay dip yazdı:
“Qızğanıç, Vişgorodqa yasаlğan doşman höcüme näticäsendä 1 keşe һälaq buldı, 11 keşe yaralandı. Alarnıñ berse — bala”.
Soñğı höcüm comğa kiçе yasalğan Rusiya dron häm raketa höcümennän soñ buldı. Ul höcümdä 3 keşe һälaq bulğan häm Ukrainada yöz meñlägän keşe utsız qalğan ide.
Tınıçlıq söyläşüläre
Ukraina ilbaşı Volodimir Zelenskiy Ukraina delegaśiyäseneñ suğışnı beterügä qağılışlı AQŞ planı turında söyläşülär ütkärü öçen şimbä könne Amerika Quşma Ştatlarına kitüen belderde.
Vaşingtonnıñ berençe täq’dimе Ukrainanıñ könçığıştağı Doneśk töbägennän çigenüen häm AQŞnıñ Doneśk, Qırım häm Lugansk töbäklären faktik räweştä Rusiya dip tanuın küzdä totqan ide.
Kiyev häm Awrupadan kilgän tänqıyt’lärdän soñ AQŞ berençe proyektın tarayttı, läkin täq’dimneñ xäzerge êçtälege äle dä bilgele tügel.
Franśiya wäqalätlese äytüençä, Zelenskiy düşämbe könne Franśiya ilbaşı Êmmanuêl’ Makron belän söyläşülär ütkärü öçen Parijğa baraçaq.
Şul uq waqıtta Kreml’ Rusiyäneñ söyläşülärgä äle dä açıq buluın häm qarşılıqnı diplomatik yullar belän çişü yaqlı buluın belderde.
