Venesuêlla AQŞ Karib diñgezendä xärbi köçlär urnaştıruga cawap itep häm İlbaşı Donald Trampnıñ yaña yanawları arqasında xalıq öçen xärbi öyränülär könen oyıştırdı.

Ber ay çaması êlek Waşington Venesuêlla yarları buyında xalıqara sularğa xärbi köymälär urnaştırıp, Puerto-Rikoga F-35 oçqıçların cibärde häm monı narkotiklarğa qarşı operaśiya dip atadı.

Venesuêlla saqlanu ministrı Vladimir Padrino Lopes AQŞnı Karib diñgezendä "iğlan itelmägän suğış" alıp baruda ğayepläde. Bu belderüne ul AQŞnıñ Venesuêlla yarlarında berniçä narkotik satuda ğayeplängän keşene üterüen beldergän höcümnän soñ yasaldı.

Karakas AQŞnı rejimnı almaştıru omtılışın yasawda häm neft belän başqa baylıqların urlawda ğayepläde.

Karakastağı Petare bistäsendä töp uram ber köngä yabılıp, qorallar belän êş itü häm başqa "inqilapçı qarşılıq kürsätü" taktikaları turında mini-kurslar ütkärelde.

"Min monda üz ilemne, watanımnı, Venesuêllanı yaqlaw öçen kiräkle närsälärne öyränergä kildem", - dip äytüçe 38 yäşlek ofis xezmätkäre Luzbi Monterola: "Min bernärsädän dä, berkemnän dä qurıqmıym", - dip basım yasadı.

“Neft, altın, almazlar”

Venesuêlla İlbaşı Nikolas Maduro artqan şuşı kiyerenkelek şartlarında küptännän inde xalıqnı mobilizaśiyälärgä tırışa.

Uzğan atnada meñlägän ixtiyari xärbilär xärbi lagerlarda öyränülärgä çaqırılğannan soñ Maduro xärbi köçlärgä bistälargä barırğa boyırdı.

Petaredä xärbilär 30 keşelek törkemnärgä qorallar belän eş itü ısulların öyrätte. Şulay uq bitleklär kiyü, berençe mediśina yärdäme äzerlege dä ütkärelde.

Karakastan tış, San-Kristobal häm Barinas şähärlärendä dä öyränülär ütkärelde.

Petaredäge çarada äti-änise belän bergä qatnaşqan 16 yäşlek Con Noriega: "Bolar barısı da neft, altın, brilyantlar (almazlar) — bezneñ baylıqlarıbız öçen" - dide ul häm: "Bez üzebezneke öçen köräşäçäkbez", - dip östäp quydı.

Däwlät televideniyese yar buylarında balıqçı köymäläreneñ xärbi qorablar belän bergä yörüen kürsätte.

Lopes: "Bügen - xalıq häm qorallı köçlär belän bergä tormışqa aşırılğan xärbi inqilapnıñ möhim ber mizgele, borılış noqtası, Bu çın xärbi inqilap”, - dip äytte.

Venesuêlla AQŞnıñ cide qorablıq flot häm atom-töş köymäse belän yanawına cawap itep Karib diñgezendäge La Orchila utrawında öç könlek xärbi künegülärne başlatıp cibärde.

“Isäpläp bulmaslıq”

Şul uq waqıtta Tramp AQŞqa cibärelgän migrantlarnı qabat qabul itmägän oçraqta Venesuêllağa "isäpläp bulmaslıq" näticälär belän yanadı.

Tramp: "Bez Venesuêllanı barlıq totqınnarnı häm psixiatriya xastaxanälärendäge keşelärne, şul isäptän dönyanıñ iñ naçar aqıl xastaxanälärendäge keşelärne, AQŞqa cibärgän keşelärne şunda uq kire qaytarıp alırğa çaqırabız", - dip äytte.

Tramp meñlägän keşeneñ şuşı “monstrlar”dan ziyan kürüen, xätta üterelüen alğa sörep: "Alarnı bezneñ ildän xäzer ük çığarığız yäisä sez tülärgä tiyeşle bäyä isäpläp bulmaslıq bulaçaq!" - dip kisätte, läkin nindi çaralar küräçägen äytmäde.

Şul uq waqıtta Maduronıñ “YouTube”tağı küpçelek çığışların urnaştırğan kanalı şimbä könne platformadan yuqqa çıqtı.