Ukraina ilbaşı Volodimir Zelenskiy İlbaşı Räcäp Tayyip Ärdoğan belän Dolmabahçe sarayındağı oçraşudan soñ uzğan matbuğat konferentsiyasendä çığış yasadı.

Zelenskiy Ärdoğanğa açıq häm komplekslı xezmättäşlek aşa Ukrainağa çın tınıçlıq häm qurqınıçsızlıqqa ireşergä mömkinlek biräçäk barlıq ömetle üseşlärne xuplarğa äzer buluı öçen räxmät belderde häm bolay dip östäde: "Bezneñ oçraşuıbıznıñ Xalıqara Qara diñgez könenä turı kilüe dä simvolik ähämiyätkä iyä".

Zelenskiy däwam itep: "Rusiyä 2014 yıldan birle agressiyäse belän Qara diñgezdäge wäzgıyätne daimi häm progressiv räweştä naçarayta", - dide.

"Törkiyä bezneñ suverenlığıbıznı, territorial’ bötenlegebezne häm Qara diñgezdä qurqınıçsız yözüne täêmin itü häm Qara diñgez töbägendä normal yäşäw şartların torgızu buyınça adımnarıbıznı daimi räweştä xuplıy".

Zelenskiy Ärdoğan belän bu mäs’älädä faydalı bulırğa mömkin bulğan qayber yaña ideyälär häm täqdimnär turında fiker alışuların belderde häm: "Min Ärdoğan äfändegä bu dialog öçen räxmät belderäm. Azıq-tölek qurqınıçsızlığı şularnıñ berse. Bügen bez Ärdoğan belän Qara diñgez aşlıq koridorı östendä êşlärgä kileştek. Bezneñ maqsatıbız - bu koridornıñ däwam itüen häm näticäle êşläwen täêmin itü", - dide.

Zelenskiy, şulay uq, noyabrneñ berençe yartısında uzaçaq Ukraina, AQŞ häm Rusiyä arasındağı öç yaqlı fsöyläşügä äzerlänülären belderde häm: "Bez İlbaşı belän bu formatnıñ perspektivaların häm başqa mömkinleklären, bigräk tä Törkiyäne häm böten Awrupanı protsessqa kertü mömkinleklären, şulay uq monda, Törkiyädä oçraşular ütkärü mömkinlegen tikşerdek", - dip östäde.