AQŞ ilbaşı Donal’d Tramp Soğud Ğaräbstanın NATO tışındağı möhim berlektäş dip atadı.
Tramp sişämbe kiçendä Soğud Ğaräbstanı täxet varisı xörmätenä oyıştırılğan aş mäclesendä "Xärbi xezmättäşlegebezne räsmi räweştä Soğud Ğaräbstanın NATO tışındağı möhim berlektäş dip tanıp tağın da arttırabız, bu alar öçen bik ähämiyätle mäs’älä” dip äytte.

Bu belderü ike däwlät arasında strategik saqlanu kileşüe imzalanğannan soñ yasaldı. Soğud Ğaräbstanı mäğ’lümat çaraları monı ozın möddätle xärbi xezmättäşlekne nığıtuçı häm töbäktä tınıçlıq, iminlek häm mulluqnı arttıruçı urtaq yöklämäne çağıldıruçı möhim adım bularaq bäyäläde.

Aq Saray belderüenä qarağanda, täxet varisınıñ Vaşington vizitı waqıtında AQŞ belän Soğud Ğaräbstanı tınıç maqsatlı atom -töş ênergiyäse häm saqlanu ölkälärendä kileşülär imzaladılar.

AQŞ idaräse ike yaqnıñ tınıç maqsatlı atom - töş ênergiyäsenä qağılışlı urtaq deklaraśiyäne raslawın äytte; bu dokument kiläse distä yıllarda milliardlağan dollar külämendäge xezmättäşlek öçen xoquqiy nigez bulaçaq dip belderde. Aq Saray monıñ atom  -töş qoralın taratmaw qağıydälärenä  turı kiterep başqarılaçağın assızıqladı.

İlbaşı Tramp F-35  oçqıçların üz êçenä alğan qoral kileşüen dä rasladı.