Paqıstan “Taliban”ı terrorçıları yäşeren urında saklanğan bomba yasaw materialları düşämbe könne şartlıy, näticädä, kim digändä 24 keşe, şul isäptän, terrorçılar häm tınıç xalıq hälaq buldı, dip xäbär itä politsiyä.

Şartlaw Xayber-Paxtunxva wilayäteneñ Tirax üzänlegendä buldı häm berniçä yaqın-tirädäge yortnı cimerep taşladı. Cirle politsiyä xezmätkäre Zafar Xan süzlärenä qarağanda, tınıç xalıqtan, kim digändä, 10 keşe, şul isäptän xatın-qızlar häm balalar, häm 14 terrorçı hälaq bulğan.

Xan äytüençä, Paqıstan “Taliban”ı (“Tehrik-e-Taliban Pakistan” yäisä “TTP” dip tä yörtelä) oyışmasınıñ ike cirle komandirı Aman Gul häm Masud Xan bu cirlektä yäşeren urın buldırğan häm anı yul çitenä quyıluçı bombalar yasaw öçen faydalanğan.

Ul “TTP” terrorçıların tınıç xalıqnı «tere qalqan» itep faydalanuda ğayepläde.

Paqıstan iminlek köçläre Xayber, Bajaur häm tönyaq-könbatışnıñ başqa öleşlärendä “TTP” terrorçılarına qarşı operatsiyälär alıp bara.

Paqıstanda terrorçı höcümnäreneñ artuı küzätelä, alarnıñ kübese öçen cawaplılıqnı “TTP” üz östenä alınğan. “TTP” ayırım törkem bulsa da, 2021 yılda Äfgan “Taliban”ı xakimiyätkä qaytqaç, alar tağın da köçäyde. “TTP” citäkçeläre häm suğışçıları Äfganstanda sıyınu tapqan dip farazlana.