Fälästin Tışqı êşlär ministrlığı yasağan belderüdä Berläşkän Millätlär Oyışmasına, anıñ berämleklärenä, xalıqara gumanitar yärdäm oyışmalarına häm ictimağıy cämğıyät oyışmalarına Ğazzädä qış başlanu belän tağın da tiränäygän gumanitar häm êkologik fäläkätkä qarşı aşığıç häm koordinaśiyälängän räweştä çaralar kürergä çaqırdı.
Belderüdä bigräk tä balalar, olı yäş'täge keşelär häm awırular belän berrättän fälästinlelärneñ ğömerenä yanawçı şartlarnıñ tağın da zurraq fäläkätkä äwerelüenä yul quymas öçen çaralar kürergä kiräklege assızıqlandı.
İzrailneñ Ğazzägä qarşı höcümnäre häm kertkän çikläwläre gumanitar krizisnı tiränäytä, şulay uq irtä torğızu êşlärenä dä qomaçawlıy, dip belderelde.
Belderüdän kürengänçä soñğı yañğırlar Ğazzädä mäcbüri räweştä küçerelgän fälästinlelär duçar bulğan gumanitar şartlarnıñ ni däräcädä awır buluın kürsätä. Salınğan zıyan hawa şartlarınıñ naçar buluı belän genä bäyle tügel. İnfrastrukturanıñ kiñ külämdä cimerelgän buluı häm İzrailneñ Berläşkän Millätlär Oyışması İminlek Şurası qararların ütämäwe dä fäläkätne tağın da awırayta.
«Waqlıtlıça sıyınu urınnarı töbäkkä kertelergä tiyeş»
Şulay uq Ğazzädäge yortsız qalğan fälästinlelärne qış salqınınnan saqlaw öçen waqlıtlıça sıyınu urınnarınıñ töbäkkä kertü kiräklege belderelde.
Fälästin azatlıq oyışmasına qarawçı Qaçaqlar êşläre idaräse dä belderü yasap, xalıqara cämäğätçelekne, BMOnı häm gumanitar yärdäm oyışmaların Ğazzädä yortlarınnan küçerelgän meñlägän ğailäne qotqaru öçen aşığıç räweştä xäräkät itärgä çaqırdı.
Belderüdä yortlarınnan küçerelgän fälästinlelärneñ abruyın saqlayaçaq imin sıyınu urınnarın buldıru, çatırlar, plastik yapmalar, yurğannar, qışqı kiyemnär häm cılıtu cihazları belän täêmin itü zarurlığı citkerelde.
Şulay uq azıq-tölek, çista su, darular häm mediśina materialları belän täêmin itüne arttıru taläp itelde.
Ğazzä xökümäteneñ Mäğlümat ofisı yasağan yazmaça belderüdä, qış fasılı başlanu belän töbäktä küzätelgän tiskäre hawanıñ İzrail höcümnäre näticäsendä yortlarınnan küçenergä mäcbür bulğan fälästinlelärneñ yäşäw şartların tağın da awıraytuı belderelgän ide.
Belderüdä äytelgänçä, Ğazzä sızığında 12 säğät êçendä 70 meñ çatırnı su basqan. Köçle yañğırlar säbäple distälägän diwar cimerelgän, şulay uq Ğazzäneñ törle töbäklärendä küp sanda keşe cäräxätlängän. Alarnıñ qayberläreneñ xäle bik awır buluı da citkerelgän ide.
İzrail höcümnäre näticäsendä zıyan kürgän häm işelü qurqınıçı astında qalğan distälägän binanıñ da cimerelüe ixtimal. Naçar hawa şartları bu qurqınıçnı tağın da arttıra.
