Törkiyä ilbaşı Räcäp Täyyip Ärdoğan xalıqara cämäğätçelekne İzrailneñ Ğazzädäge ğämällärenä qarşı nıq häm qatğıy totış kürsätergä çaqırdı, diplomatik basımnı arttıruğa, özleksez gumanitar äyrdäm kürsätüneñ ähämiyätenä basım yasadı.
Ärdoğan G20 liderlar cıyılışında qatnaşu öçen Könyaq Afrikada bulğannan soñ qaytışlıy oçqıçta jurnalistlarğa bolay dide:
“Xalıqara cämäğätçelekneñ nıq häm qatği totışı Netanyaxunı tuqtataçaq”.
İzrailneñ utnı tuqtatu kileşüen bozuı turında Ärdoğan bolay dip äytte:
“Xamas” İzrailneñ barlıq bu provokaśiyälärenä qarşı zur sabırlıq kürsätä häm utnı tuqtatuğa tuğrılıqlı qala. Utnı tuqtatu kileşüen tulısınça ütärgä kiräk”.
Ärdoğan töbäk iminlege mäs’äläsendä qurqınıç sizelgän oçraqta Änkaranıñ qatğıy çaralar küräçägen kisätte.
“İlebezneñ milli iminlege häm tınıçlığı turında süz barğanda, êlegräk närsälär êşläwebezne härkem belä. Bez oxşaş qurqınıçlar barlıqqa kilüen telämibez, läkin kilep çıqsa kiräk bulğannı êşlärbez”,-dide ul.
Ärdoğan Törkiyäneñ Rusiya–Ukraina konfliktında aradaşçı bulırğa äzer buluın tağın ber tapqır assızıqladı:
“Törkiyä bularaq êlegräk İstanbulda niçek möhim rol’ uynağan bulsaq, bügen dä şundıy uq konstruktiv totışnı däwam itärgä äzerbez”.
AQŞ ilbaşı Donald Trampnıñ Ukraina öçen täq’dim itkän 28 maddäle solıx planına qağılışlı sorawlarğa cawap birgän Ärdoğan bolay dide:
“Ägär plan yaña totrıqsızlıq tudırmaslıq itep yaqlarnıñ qanuni ömetlären häm iminlek ixtıyacların qanäğat’ländersä kileşü mömkin bulaçaq”.
Ärdoğan Törkiyäneñ üzgärüçän global’ ittifaqlar arasında “kütärelüçe köç” bularaq üz yünäleşen däwam itäçägen belderde. Ul şulay uq milli tanklar, oçqıçlar häm pilotsız hawa sistemaların da üz êçenä alğan yuğarı texnologiya, ênergiya häm saqlanu tarmaqlarına yasalğan investiśiyälärgä basım yasadı.
Ul ğailä strukturasın saqlawnıñ häm säyäsätlärne 50 yılğa, 100 yılğa ayırım iğ’tibar belän planlaştırunıñ töp maqsatlar buluın äytte.
Ärdoğan süzlären tübändägeçä tämamladı:
“Bez üz yulıbıznı üzebez bilgelibez, üz yazmışıbıznı üz qullarıbız belän tözibez. Bez qabul itep alğan Törkiyä belän bügenge Törkiyä arasında zur ayırma bulğan kebek, kiläçäk buınnarğa tapşıraçaq Törkiyä dä bügengedän küpkä aldaraq bulaçaq”.
