Kreml’ süzçese Dmitriy Peskov Rusiyäneñ Törkiyäneñ Ukraina konfliktın çişügä öleş kertü telägen xuplawın belderde.

Comğa könne Törekmänstan başqalası Aşxabadta uzğan matbuğat konferenśiyäsendä çığış yasağan Peskov Mäskäwneñ Törkiyä ilbaşı Räcäp Tayyip Ärdoğannıñ konfliktqa qağılışlı belderülärennän qanäğat’ buluın citkerde.

Peskov bolay dide: “Ärdoğan Törkiyäneñ aradaşçılıq tırışlıqların däwam itärgä häm tınıçlıq barışına öleş kertergä äzerlegen häm telägen belderde, ilbez monnan bik qanäğat’”.

Aşxabadtağı Xalıqara tınıçlıq häm ışanıç forumında Urta Aziya liderları Ukraina mäs’äläse turında söyläştelärme digän sorawğa Peskov ”Söyläşmädelär diyärlek” dip cawap birde.

Kreml’ süzçese AQŞ ilbaşı Donal’d Trampnıñ Ukraina häm Awrupa Berlege wäkillare belän oçraşıp oçraşmayaçağı turındağı sorawğa Mäskäwneñ mäğ’lümatı bulmawın äytte.

Ärdoğan Putin belän oçraştı

Törkiyä ilbaşı Räcäp Tayyip Ärdoğan comğa könne Aşxabadta uzğan Xalıqara tınıçlıq häm ışanç forumında Rusiya däwlät başlığı Vladimir Putin häm başqa liderlar belän oçraştı.

İlbaşı idaräse X platformasında xäbär itkänçä, Ärdoğan Putin, Paqıstan prem’yer-ministrı häm Törekmänstan ilbaşı belän oçraşular ütkärde.

Ärdoğan kümäk fotoräsemgä töşär aldınnan İran ilbaşı belän dä qısqa oçraşu ütkärde.

İlbaşınıñ oçraşuları Törekmänstannıñ daimi bitaraflıq statusınıñ 30 yıllığın häm BMO ğomum şurasınıñ 2025 nçe yılnı Xalıqara tınıçlıq häm ışanıç yılı dip iğ’lan itüen bäyräm itüdän soñ ütkärelgän forumdağı diplomatik êşçänlegeneñ ber öleşe bulıp tora.