BMOda Zelenskiy belän küreşkän Donald Tramp Rusiyä mäs’äläsendäge totışın üzgärtte
AQŞ liderı Rusiyäne kägäzdän yasalğan yulbarıs dip atap, totışın üzgärtte. Zelenskiy isä monı zur üzgäreş dide.
AQŞ ilbaşı Ukrainanıñ xäzerge waqıtta Rusiyä tarafınnan yawlap alınğan barlıq cirlären kire alu öçen yaraqlı poziśiyadä buluın äytte. Bu belderü Trampnıñ suğış mäs’äläsendä monnan alda kürsätkän totışınnan waz kiçüen añlata.
Tramp Nyu-Yorktağı BMO ğomum şurası waqıtında Ukraina däwlät başlığı Volodimir Zelenskiy belän yabıq işeklär artında ütkärgän söyläşüdän soñ Rusiyäneñ iqtisadi zäğıyflegeneñ tigezleklärne üzgärtüen citkerde.
Tramp “Truth Social” platformasında belderü yasap bolay dide: “Awrupa Berlege yärdäme belän Ukrainanıñ original’ çiklären kire alu maqsatı belän suğışu häm ciñü öçen yaraşlı poziśiyadä buluın uylıym. Waqıt, sabır häm Awrupanıñ ayıruça da NATOnıñ finans yärdäme belän bu suğış başlanğan waqıttağı çiklärne kire qaytarunı saylıybız. Nik bulmasın di? Rusiyä öç yıl yarım maqsatsız suğışa.”
Rusiyäne kägäzdän yasalğan yulbarıs dip atağan Tramp Kiyev citäkçelegeneñ 2014 yılda Mäskäw citäkçelege qanunsız räweştä yawlağan Qırımnı da kire ala alaçağın äytte.
Tramp: “Putin häm Rusiyä zur iqtisadi qıyınlıq kiçerä häm bu Ukrainanıñ êşkä kereşüe öçen döres waqıt. Här oçraqta ike ilgä dä uñışlar telim. NATOğa qoral cibärergä däwam itäçäkbez häm NATO bu qorallar belän telägänen başqara ala,” – dip yazdı.
Zelenskiy belderüne qanäğatlelek belän qarşı aldı
Zelenskiy Tramp belderüeneñ AQŞ säyäsätendä zur üzgäreş buluın citkerde.
Zelenskiy sişämbe könne Ukraina köçläreneñ bu ayda 360 kvadrat çaqrımlıq yaw astındağı cirlärne kire aluın häm meñ Rusiyä ğaskäriyen qamawın belderde.
Ukraina liderı Mäskäw citäkçelegenä östämä sankśiyalär kertergä çaqırıp, Trampnıñ Awrupa illären Rusiyädän neft alunı tuqtatu çaqıruın xupladı.
Trampnıñ soñğı süzläre fevral ayında Zelenskiy belän ütkärgän qırıs söyläşügä turı kilmi. Ul söyläşüdä Tramp Ukrainalı liderğa bolay digän ide: “Xäzerge waqıtta yaxşı wazğıyättä tügel sez. Üzegezne bik naçar xälgä kiterdegez. Bezneñ belän bulsağız, äybät bulır.”
Donald Tramp bu ay başında NATO äğzaläre Rusiyä nefte importın kümäk räweştä tuqtatqan häm moña oxşaş adımnar yasağan oçraqta Rusiyägä zur sankśiyalär kertergä äzer buluın äytkän ide.
