Hindstan Berläşkän Ğäräp Ämirleklärennän sıyıqlandırılğan tabiği gaz satıp alu öçen 3 milliard dollarlıq kileşü imzaladı häm şulay itep Berläşkän Ğäräp Ämirlekläreneñ iñ zur kliyentına äylände, ike il citäkçeläre isä säwdä häm saqlanu ölkälärendäge mönäsäbätlärne nığıtu maqsatında söyläşülär ütkärdelär.
Kileşü düşämbe könne Berläşkän Ğaräp Ämirlekläre ilbaşı Şäyex Möxämmäd bin Zäyed äl Nähyannıñ Hindstanğa ike säğat’lek qısqa säfäre waqıtında imzalandı; söyläşülär Hindstan prem’yer-ministrı Narendara Modi belän ütkärelde.
İke lider ike yaqlı säwdäne 6 yıl êçendä 200 milliard dollarğa citkerergä wäğ’dä birdelär häm strategik saqlanu partnyerlığı urnaştırırğa kileştelär.
Şirkätlärneñ mäğ’lümatlarına qarağanda, Äbu - Dabi milkendäge “ADNOC Gas” Hindstannıñ “Hindustan Petroleum Corp.” kompaniyäsenä 10 yıl däwamında yıl sayın 0,5 million metrik tonna sıyıqandırılğan gaz cibäräçäk.
“ADNOC Gas” beldergänçä, bu kileşü Hindstan belän tözelgän kileşülärneñ ğomumi bäyäsen 20 milliard dollardan arttıra.
“Hindstan xäzer Berläşkän Ğaräp Ämirlekläreneñ iñ zur kliyentı häm “ADNOC Gas” nıñ sıyıqlandırılğan gaz strategiyäseneñ bik möhim öleşe”,- dip xäbär itä kompaniya.
Berläşkän Ğaräp Ämirlekläre – Hindstannıñ öçençe zur säwdä partnyerı häm Şäyex Möxämmäd säfärgä saqlanu häm tışqı êşlär ministrları da kergän xökümät delegaśiyäse belän kilde.
Hindstan tışqı êşlär ministrlığı kiñäşçese Vikram Misri jurnalistlarğa beldergänçä, yaqlar strategik saqlanu partnyerlığı urnaştıru östendä êşläw öçem niyät xatına qul quydılar.
Hindstannıñ töp köndäş kürşese Paqıstan uzğan yıl Soğud Ğaräbstanı belän üzara saqlanu kileşüe imzaladı, ä uzğan atnada Paqıstan ministrı Törkiyä, Paqıstan häm Soğud Ğaräbstanı arasında öç yaqlı saqlanu kileşüe proyektı äzerlänüen äytte.
Yıllar buyı yaqın berlektäşlär bulgan Soğud Ğaräbstanı belän Berläşkän Ğaräp Ämirlekläre töbäk säyäsäte mäs’älälärendä torğan sayın törleçä fikerdä ; bu ayırma Yämändä dä çağılış taptı häm ike il arasında neft’ citeşterü mäs’älälärendä dä qarşılıqlar tudı.
Misri niyät xatına qul quyu Hindstannıñ töbäk konfliktlarına quşılaçağı mäğ’näsınä turı kilmäwen belderde. “Bezneñ töbäktäge ber il belän saqlanu häm iminlek ölkälärendäge xezmättäşlegebez şul töbäktäge bilgele ber konfliktlar yaqlı bulaçağıbıznı añlatmıy” dide.
