Zoxran Mamdani şähär ratuşasında uzğan tantanada Nyu-Yorknıñ 112nçe mêrı bularaq ant itte. Ul AQŞnıñ iñ zur qalasın citäkläwçe berençe möselman häm Könyaq Aziyalı.

Mamdani wazıyfasına kereşü antın Qor'än totıp birde. Tantananı AQŞ senatorı Berni Sanders, anıñ progressiv kampaniyäsen yaqlap, ikençe tapqır ütkärde.

«Min sezgä şunı wäğdä itäm: ägär sez Nyu-Yorklı ikän — min sezneñ şähär başlığı. Fikerlärebez kileşäme, kileşmime — möhim tügel, min sezne yaqlayaçaqmın, sezneñ belän bäyräm itärmen, sezneñ belän qayğırırmın häm ber genä sekundqa da sezdän yıraqlaşıp yuqqa çığmayaçaqmın,» — dip äytte Mamdani ratuşağa cıyılğan yaqlawçıları, şähär wäkilläre häm ğailä äğzalarına.

«Min demokratik sotsialist bularaq saylandım häm demokratik sotsialist bularaq idarä itäçäkmen. Min üzemneñ printsiplarımnan radikal dip sanaludan qurqu arkasında baş tartmayaçaqmın,» — dip östäde ul häm wäğdäläre arasında barlıq keşelär öçen balalar qarawnı ciñeläytü häm toraq arendası bäyäläreneñ artuın tuqtatu buluın xäterlätte.

Mamdani üz idaräseneñ ber genä Nyu-Yorklını da töp ixtiyaclardan mäxrüm qaldırmasqa tırışaçağın häm şähärneñ bay êlitа yäisä bülengän qatlamğa xezmät itmäyäçägen belderde.

“İñ zur säyäsi syurpriz”

Sanders Mamdaninıñ ciñüen zamança Amerika tarixınıñ iñ zur säyäsi sürprizı dip atadı häm toraqnı arzanraq itü, cämäğat transportın kiñäytü häm balalar qarawnı tüläwsez itü wäğdäläreneñ radikal’ tügel, döres häm keşelekle närsälär ikänen belderde.

Kongress äğzası Aleksandria Okasio-Kortez äytüençä, Mamdaninıñ kütärelüe şähär öçen yaña däwer başlap cibärä. Ul anı “härkem öçen mêr” dip atadı.

34 yäşlek Mamdani - Nyu-Yorknıñ iñ yäş häm Afrikada tuğan berençe şähär başlığı.

Ul Ugandanıñ Kampala qalasında hindstanlı möhacir ğailäsendä tuğan häm 2018 yılda AQŞ watandaşlığına iyä bula.