Frantsiyä däwlät başlığı Êmmanuêl Makron AQŞ ilbaşı Donald Tramp häm anıñ iranlı xezmättäşe Mäsud Päzäşkiyannı İran belän suğışnı tuqtatuğa yünältelgän häm tuqtap qalğan söyläşülärne yañadan başlarğa çaqıruın äytte.

Düşämbe könne ike lider belän söyläşkännän soñ Makron sişämbe könne “X” çeltärendä: "Min İslamabadta tuqtatılğan söyläşülärne yañadan başlarğa, añlaşılmawçanlıqlarnı xäl itärgä häm xälneñ tağın da kiskenläşüenä yul quymasqa çaqırdım", -dip yazdı.

"Barlıq yaqlarnıñ, şul isäptän, Livannıñ da, utnı tuqtatunı qatğıy ütäwläre ayruça möhim", dide Makron.

Ul, şulay uq, konflikt başlanğannan birle yabılğan möhim neft häm gaz transportı yulına sıltama yasap, "Ormuz buğazın mömkin qädär tizräk, şartsız, çikläwlärsez häm tüläwlärsez yañadan açu da möhim", dip östäde.

Makron ofisı sişämbe könne yasağan belderüdä Frantsiyä häm Britaniyäneñ comğa könne buğaznıñ iminlegen täêmin itü öçen "tulısınça saqlanu maqsatlı missiyägä quşılırğa äzer däwlätlär belän" videokonferentsiyä ütkäräçägen xäbär itte.

Tramp düşämbedän başlap buğaz buyındağı İran portlarına blokada iğlan itte.