BMO ğomum şurası Fälästin xalqınıñ üzbilgelänü xoquqın, şul isäptän bäyses Fälästin däwläte tözü xoquqın raslawçı qarar proyektın küpçelek tawış belän qabul itte.
Qarar 164 äğ’za däwlätneñ xuplawı belän qabul itelde. 8 il (İzrail, AQŞ, Mikroneziya, Argentina, Paragvay, Papua -Yaña Gvineya, Palau häm Nauru) qararğa qarşı tawış birde.
“Xalıqlarnıñ üzbilgelänü xoquqı” kön tärtibe maddäse qısalarında qabul itelgän qarar BMOnıñ Fälästin xalqınıñ üz säyäsi statusın irekle bilgeläw, iq’tisadi, sośial’ häm mädäni üseşen däwam itü xoquqın tanu turındağı küptänge totışına qabat basım yasadı.
Tekstta BMOnıñ êlekkege qararlarına häm xalıqara xoquqıy dokumentlarına, şul isäptän BMO Ustavına häm xalıqara keşe xoquqları konvenśiyälärenä sıltama yasalıp, üzbilgelänü xoquqınıñ xalıqara xoquqnıñ töp prinśibı buluı assızıqlandı.
Qarar şulay uq barlıq däwlätlärne, BMO oyışmaların bu xoquqqa mömkin qadär tizräk ireşüdä Fälästin xalqına yärdäm kürsätüne däwam itärgä çaqırdı.
Monnan tış, Könçığış Qodüsne dä kertep, basıp alınğan Fälästin cirläreneñ territorial’ bötenlegenä, berdämlegenä xörmät kürsätü kiräklege assızıqlandı.
Qararda xalıqara xoquq häm bäyläneşle BMO qararları qısalarında ğadel, daimi häm kiñqırlı tınıçlıqqa yaqlaw da yañartıldı.
