Räcäp Tayyip Ärdoğan İlbaşı Kompleksında uzğan Awıl başlıqları cıyılışında Törkiyäneñ törle poçmaqlarınnan kilgän moxtarlar belän oçraştı.

Ul üz çığışında: "Bezneş töbäktä krizis dawılı köçäyä", - dide häm bolay däwam itte:

"Bezneñ tönyağıbızda Rusiyä-Ukraina suğışı berniçä aydan 5 yıllığın bilgeläp ütäçäk. İzrailneñ Fälästingä höcümnäre, imzalanğan kileşülärgä qaramastan, tuqtamıy. Kürşebez İrandağı kiyerenkelek tulısınça basılğançı, Yämändä yaña konflikt başlandı. Dustıbız häm qardäşebez Soğud Garäbstanına qarşı “Xusilär”neñ höçümnäre töbägebezdä kiyerengelekne tağın da köçäytte. Riyad aêroportına höcümdä küp kenä möselman qardäşleräbez, şul isäptän, xacilar, hälaq buldı. Yözlägän keşe yaralandı. Bez Livanğa qarıybız, häm qızğanıçqa qarşı, andağı wäzğıyät ber dä ömetländermi. Süriyädän yaxşı xäbärlär kilä, läkin sionist İzrail bu töbäkne dä totrıqsızlandıru öçen qulınnan kilgänneñ barısın da êşli. Min härwaqıt äytkänçä, bezne ut bocrası äyländerep alğan".

Ärdoğan bolay dip däwam itte: "Bu xaos häm krizis moxitendä bez köne-töne Törkiyäneñ başındağı ber çäç börtegenä dä zıyan kilmäsen öçen êşlibez. Allahqa şöker, bez älegä qadär bu êştä uñışqa ireştek. Bez ilebezne tirä-yündäge konfliktlardan yıraq tottıq. Bez provokatsiyalärgä bireşmädek, tozaqqa êläkmädek. Bez bu qatlawlı protsesslarnıñ barısın da aqıl, sabırlıq häm sälamät aqıl belän uñışlı başqardıq".

İlbaşı üz çığışın bolay tämamladı:

"Bez dönyanı êkspluatatsiyäläp häm töbägebezne qan diñgezenä äyländerep, üzläreneñ çäçäk atu sistemasın buldırırğa teläwçelär aldında baş imäyäçäkbez. Bez qarañğı häm pıçraq uyınnarğa qarşı bik saq bulaçaqbız... Bez möselmannarnı ber-bersenä qarşı quyarğa tırışuçılarğa qarata uyaw bulaçaqbız. Bez millätebezneñ ömeten sındırırğa, anı ruxsızlandırırğa häm arabızda nizağ divarları kütärergä tırışuçılarğa qarşı härwaqıt uyaw bulaçaqbyz".