Törkiyä ilbaşı Räcäp Täyyip Ärdoğan AQŞ ilbaşı Donal’d Tramp belän söyläşülär ütkärü öçen Vaşingtonğa kilde.

Tramp Ärdoğannı pänceşämbe könne Aq Yortta qabul itäçäk häm yaqlar arasında ike yaqlı mönäsäbätlär, regional’ mäs’älälär qaralaçaq.

İke lidernıñ säwdä, investiśiya häm saqlanu sänäğate kebek  mäs’älälärne qarawı kötelä.

Ärdoğan monnan alda yasağan belderüendä:
"İlbaşı Tramp belän ütkäräçäk söyläşülärebezneñ urtaq global’ tınıçlıq qaraşıbız qısalarında töbägebezdä suğış häm qarşılıqlarnı tuqtatuğa öleş kertäçägenä, däwlätlärebez arasındağı xezmättäşlekne tağın da nığıtaçağına ışanam”,— dip äytkän ide.

Ärdoğan bıyılğı BMO ğomum şurası utırışında qatnaşu öçen kilgän N’yu - Yorkta sişämbe könne Tramp häm anıñ xäläl cefete Melaniya Tramp tarafınnan däwlät başlıqları häm alarnıñ xäläl cefetläre xörmätenä oyıştırılğan qabul itüdä qatnaştı.

Ärdoğan sişämbe könne Tramp belän bergä Ğomum şura cıyılışları waqıtında ütkärelgän Ğazzä temalı küp yaqlı oçraşuda da qatnaştı.

Yabıq işeklär artında ütkän bu oçraşu turında mäğ’lümat birelmäde, läkin Ärdoğan oçraşudan soñ söyläşülärneñ bik näticäle häm uñay uzuın äytep, üzeneñ qanäğat’ qaluın belderde.

Ärdoğan N’yu - Yorktağı Törkiyä diplomatiya üzäge bulğan Törek yortı aldında jurnalistlarğa:
"Bik näticäle häm matur oçraşunı tämamladıq. Näticäläre xäyerle bulsın”,— dip belderde.

Ärdoğan Vaşingtonda AQŞ ilbaşınıñ räsmi qunaq yortı — Blair Housta toraçaq.