Rusiyä Keşe xoquqları ombudsmenı Tat’yana Moskal’kova düşämbe könne yasağan belderüendä Ukraina parlamentınıñ keşe xoquqları komissarı Dmitriy Lubineś belän ütkärgän oçraşuda suğış äsirläre belän almaşunı kiçektergesez yañadan başlaw turında fiker alışuların belderde.

Moskal’kova “Telegram”dağı yazmasında dürt aydan artıq  totqınnar almaşu bulmawın bilgeläp uzdı.

Ul:” Ukraina Yuğarı Radası ombudsmenı Dmitriy Lubineś belän oçraşuda dürt ay  däwamında almaşu bulmawın isäpkä alıp , totqınnar almaşudağ kirtälärne aşığıç raweştä beterü mäs’äläsen kütärdem”,- dide.

Moskal’kova oçraşunıñ qayda häm qayçan buluın äytmäde. Läkin Moskal’kova da, Lubineś ta comğa könne “Telegram” kanallarında Jenevada buluların häm Xalıqara Qızıl Xaç komitetı räise Mir’yana Spolyariçnıñ oyışmanıñ ğomum üzägendä ike räsm zat belän dä ayırım-ayırım oçraşular ütkärüen xäbär itkännär ide.

Tat’yana Moskal’kova, Rusiyä saqlanu ministrlığınıñ almaşu prośessı öçen törle formatlarnı qat-qat  täq’dim itüen, ämma Ukraina yağınıñ tiyeşle qararlarnı qabul itüne  kiçekterüen belderde.

“Änilär häm xäläl cefetlär borçılıp yaqınnarın kötälär. Alarnıñ mömkin qadär tizräk öylärenä qaytuları keşeleklelek häm şäfqat’lelek kürsätkeçe bulır ide”,- dide ombudsmen. Ul Ukrainadağı wazıyfadaşına Rusiyädä totılğan häm almaşu qısalarında tizdän azat itelergä mömkin bulğan Ukraina xärbiläre isemlegen dä tapşıruın östäde.

Moskal’kova “Ukraina yağınıñ täq’dimnären kötäbez” dide häm Jeneva kileşüe nigezendä yaralanğan Rusiya äsirlären dä üz illärenä tapşıru kiräklegen citkerde.

İke yaqtan da 185 keşe qaytarılğan soñğı totqın almaşı oktyabr ’ayında buldı. Totqın almaşuğa qağılışlı berençe kileşülärgä İstanbulda uzğan Rusiya -Ukraina söyläşüläre waqıtında ireşelde.

Yaqlar arasında ütkärelgän öç tur söyläşülär näticäsendä «1.000gä 1.000» almaşu, tağın ber zur külämle almaşu planı, hälaq bulğan xärbilärneñ cäsädlären üzara tapşıru häm här ike yaqtan da kim digändä 1.200 totqınnı qaytarunı küzdä totqan kileşülärgä qul quyıldı.