Livan ilbaşı Jozef Aun düşämbe könne aşığıç evakuaśiya ämere birelgän häm Livannıñ könyäğı belän könçığışında urnaşqan törle rayonnarğa oyıştırılğan İzrail höcümnären gäyepläde. İzrail sişämbe könne irtän Sidonda öç qatlı binanı da bombaladı. Höcümdä ber keşe yaralandı.
Aun sişämbe könne yasağan belderügä kürä İzrail höcümnäre utnı tuqtatu mexanizmı komitetı cıyılışı aldınnan buluı säbäple citdi sorawlar tudırdı. Älege cıyılışta Livannıñ könyağındağı iminlek häm totrıqlılıqnı yañadan täêmin itü öçen konkret adımnar qaraluı, şul isäptän İzrail köçläreneñ könyaq çikkä çigenüe, Livan totıqlılarınıñ azat itelüe häm Livan armiyaseneñ BMO iminlek şurasınıñ 1701 nomerlı qararına yaraqlı räweştä urnaştırıluı kebek törle mäs’älälärneñ qaraluı kötelä ide.
Livan ilbaşı: "İzrailneñ däwam itüçe höcümnäre Livannıñ kürgän çaralarına qaramastan kiyerenkelekne kimetügä yünälgän cirle, regional häm xalıqara tırışlıqlarnı yuqqa çığarunı maqsat itep quya," – dide.
Aun: "Livan armiyase bu çaralarnı professionallek, tögällek, disśiplina belän çınğa aşırdı," – dide.
Aun İzrailneñ Livandağı höcümnären tuqtatu häm mexanizm komitetınıñ wazifasın ütäwen täêmin itü öçen xalıqara cämäğatçelekne qabat êffektiv räweştä qatışırğa çaqırdı.
İzrail mediasında Livan xökümäte häm armiyaseneñ “Xizbullah” qoralların yuq itmägän oçraqta oyışma poziśiyalären maqsat itep alaçaq zur külämle höcümgä äzerlänüe turında xäbärlär çıqqan ide.
Livan häm İzrail 2024 yılnıñ noyabrendä utnı tuqtatu kileşüen tözede. İke il arasındağı bäreleşlärdä 4 meñnän artıq keşe ülde häm 17 meñ keşe yaralandı.
Utnı tuqtatu kileşüe nigezendä İzrail armiäse bu ğinwar ayında Livan könyağınnan çigenergä tiyeş ide. İzrail öleşçä genä çigende häm çik buyındağı biş iminlek bülekçäsennän kitmi.
