Şimbä könne Keşe xoquqların yaqlaw oyışması İran külämendäge protestlarda 3000 nän artıq keşeneñ hälaq buluın, 8 könlek özelüdän soñ ildä internet êşçänlegeneñ biz az ğına bulsa da artuın belderde.

AQŞta urnaşqan HRANA törkeme 3090 keşeneñ, şul isäptän  2.885 protestçınıñ ülemeneñ raslanuın citkerde.  

“Reuters” agentlığına mäğ’lümat birgän cirle xalıqtan berniçä keşe başqala Tähranda 4 kön däwamında çağıştırmaça tınıç buluın, şähär östennän dronnar oçuın, läkin pänceşämbe häm comğa könnärendä zur protestlar bulmawın beldergän.

İldäge protestlar 28 nçe dekabr’dä iq’tisadi qıyınlıqlar arqasında başlandı häm kiñ qolaçlı rizasızlıq belderü çaralarına äylände.

İnternetnı küzätü törkeme NetBlocks “X” platformasında xäbär itüençä, ülçäwlär 200 säğat’lek özeklektän soñ bügen irtän İranda internetqa totaşunıñ bik azğa bulsa da artuın kürsätkän.

Çit ildä yäşäwçe berniçä iranlı sośial’ mediada şimbä irtäsendä İrandağı qullanuçılar belän yazışa aluların beldergännär.

İran protestçılarğa ülem cäzası birgän oçraqta bik qatğıy çaralar belän yanağan AQŞ ilbaşı Donal'd Tramp, Tähran citäkçeläreneñ kümäk ülem cäzasın ğamäldän çığaruların citkerde.

İran isä mondıy ülem cäzasına qağılışlı plannarı yäki alarnı ğamäldän çığaru turında bernindi mäğ’lümat urtaqlaşmadı.