Törkiyä ilbaşı Räcäp Tayyip Ärdoğan 15 iyül’ - Demokratiya häm Milli berdämlek köne uñayınnan "15 iyül’: Törkiyä Ğasırınıñ İstiqlal Bäyannämäse" isemle ber mäqalä yazdı.

Ärdoğan: "15 iyül’ - mäkerle tüntäreleş omtılışı uñışsız bulğan kön genä tügel, mıllätebez üz ixtıyarın, demokratiyasın häm bäysezlegen saqlap qalğan, tarixqa altın xäreflär belän yazılğan zur demokratiya ciñüe bulıp tora,” - dide.

Gazetlarda basılğan mäqaläne ilbaşı tübändäge yullar belän başlap cibärde: "Böyek millät tarix ağışın üzgärtep, üz bäysezlege häm kiläçäge öçen ğomere qimmätenä köräşkän ul şomlı tönnän soñ näq 10 yıl uzdı."

"15 iyül’ - mäkerle tüntäreleş omtılışı uñışsız bulğan kön genä tügel, mıllätebez üz ixtıyarın, demokratiyasın häm bäysezlegen saqlap qalğan, tarixqa altın xäreflär belän yazılğan zur demokratiya ciñüe bulıp tora. ul tönne bezneñ asıl millätebez bäysezlek suğışındağı kebek ük watanıbızğa bärep kerergä tırışqan imperialistlarğa häm alarnıñ xezmättäşlärenä tarixtağı iñ zur sabaqlarnın bersen birde.

"Millätebezgä möracäğat itüebez ğaziz millätebezneñ demokratik ayıq aqılına, ziräklegenä häm batırlığına bulğan ışanıçıbıznıñ çağılışı ide. Şökerlär bulsın, millätebez bu ışanıçnı yuğaltmadı, ul tağın ber tapqır üzeneñ bäysezlege häm kiläçägen saqlap qaldı. Ul tönne xalqıbız üz ixtıyarına tağılaçaq çılbırlarnı özde, opeka häm xıyanät boğawların alıp taşladı, Törkiyä aldındağı kirtälärne beräm-beräm cimerde. Ul tönne 253 watandaşıbız şähit buldı, 2 meñnän artıq qardäşebez yaralandı. Bu sannarnıñ härberse – watannı, bayraqnı häm milli ixtıyarnı yaqlaw öçen kürsätelgän fidaqarlek, batırlıq häm qaharmanlıq dälile”, - dip yazdı Ärdoğan üz mäqaläsendä.