Vyetnamdağı köçle yawım-töşem ilneñ tönyağındağı qayber töbäklärdä su basularğa kitergän. Näticädä 2 meñnän artıq öy su astında qalğan, meñlägän xaywan ülgän.
Räsmi zatlar bu atnada Vyetnamnıñ tönyaq häm tönyaq-üzäk töbäklärendä küzätelgän köçle yawım-töşem arqasında su däräcäseneñ qayber urınnarda 50 santimetrdan artuın belderde.
Su basu säbäple transport xäräkätendä özekleklär buluı, 2 meñnän artıq öyneñ su astında qaluı, döge häm başqa kulturalarnıñ zıyan kürüe, meñlägän mögezle êre häm waq terlek, şulay uq qoş-qortnıñ ülüe citkerelde.
Däwlät matbuğatı xäbär itkänçä, Txan Xoa töbägendäge räsmi zatlar mäktäpkä baru qurqınıç bulu säbäple uquçılarğa öylärendä qalırğa kiñäş itte.
Şul uq waqıtta başqala Xanoyda küp kenä uramnıñ su astında qaluı, yul xäräkäteneñ bozıluı, grajdanlarnıñ êşkä baruı häm balalarnı mäktäpkä alıp barunıñ qıyınlaşuı xäbär itelde.
Monnan tış, Xanoyda kiñ külämle su basular arqasında küp kenä urta mäktäp häm universitetta onlayn däreslärgä küçtelär.
Xanoynıñ könyaq-könbatışındağı bistälärendä Bui yılğasında su däräcäse qayber öylärne su astında qaldırırğa mömkin däräcägä citkän.
Şunnan soñ räsmi zatlar tirä-yaqta yäşäwçelärneñ äyberlären biyegräk urınnarğa küçerergä yärdäm itü öçen yözlägän xärbine cibärgän.
Meteorologlar yawım-töşemneñ 21 sentyabrgä qadär däwam itäçägen belderä.
