Süriyälelär 61 yıllıq Baas rejimı cimerelüeneñ berençe yıllığın bäyräm itep häm ilneñ azat, imin däwlätkä äwerelüe turında yaña ömetlär belän bilgeläp uza.

Başqala Dimäşqta yäşäwçelär bärep töşerelgän Bäşar äl-Ässad rejimı astında bulğan qıyınlıqlarnıñ betüen belderä häm yaña xökümätneñ Süriyäne irekle, iqtisad häm iminlek yağınnan tağın da yaxşıraq kiläçäkkä iltäçägenä ışana.

Ässad rejimı cimerelgännän soñ tözelgän yaña xökümät köndälek tormışqa turıdan-turı täêsir itüçe qararlar qabul itep, êlektr ênergiyäse häm däwlät xezmätkärlärenä tüläw kebek töp xezmätlärne täêmin itü öçen adımnar yasıy başladı.

İyün ayında ilbaşı qararı buyınça däwlät xezmätkärläreneñ xezmät xaqı 250 000 Süriyä lirasınnan (ul waqıttağı yaqınça 15 dollar) 750 000 Süriyä lirasına (yaqınça 65 dollar) kütärelde.

Şul uq waqıtta, 14 yıl däwam itkän bäreleşlärdä ilneñ şaktıy zıyan kürgän ênergetika çeltären tözätü häm texnik xezmät kürsätü êşläre başlanıldı.

İlneñ ênergetika ministrlığı töp stansiyälärdäge êşçänlek näticäsendä citeşterü köçe artuın, häm bu êşlärdä Törkiyäneñ yärdäme belän Azärbaycannan alınğan tabiğıy gaznıñ öleşe zur buluın belderde.

Bärep töşerelgän xökümät waqıtında êlektr ênergiyäsen birü köndä berniçä säğat belän çiklängän bulsa, yaña çaralar belän ul köndälek 8–10 säğatkä citkerelde.

Monnan tış, Xaläp, Xoms häm Dimäşq kebek zur şähärlär 15 yıldan soñ berençe märtäbä, täcribä maqsatınnan, 24 säğat buyı tuqtawsız êlektr belän täêmin itelde.

Süriyä tarixında kara êzlären qaldırğan Sednaya, Mäzzäh häm Xatib kebek törmälär bötenläygä yabıldı.