Şärif Osman Hadineñ üterelüe belän başlanğan häm 2 kön buyı däwam itüçe protest çaralarınnan soñ şimbä könne 10 meñlägän keşe Bangladeş başqalasındağı cänaza cıyınına kilde.

Uzğan yılğı demokratiya taraflı baş kütärüneñ aldınğı isemnärennän bulğan Şärif Osman Hadiğa Dakkadağı mäçettän çıqqanda bitlekle keşelär ut açtı. Pänceşämbe könne Singapurdağı ber xastaxanädä yaqtı dönyadan kitte ul.

Cänaza namazı uqılğan Parlament binası yanında öslärenä kameralar urnaştırılğan poliŝiya xezmätkärläre bar ide.

Comğa könne başqalağa kiterelgän Hadi Dakka universitetınıñ üzäk cämiğında cirlände.

Waqıtlı lider Möxämmäd Yunıs yasağan çığışında bolay dide: “Biregä xuşlaşırğa dip kilmädek. Sin - bezneñ yörägebezdä häm il ayaqta bulğan sayın barlıq Bangladeşlılarnıñ yörägendä bulaçaqsıñ.”

32 yäşlek aktivist Hindstannı açıqtan-açıq tänqıytläwçe bularaq tanıla ide häm fevral ayındağı ğomumi saylawda qatnaşaçaq ide.

Hadineñ üleme kiñ qırlı xozursızlıqlarğa kiterde, Könyaq Aziya ileneñ här poçmağındağı protestçılar cawaplılarnıñ qulğa alınuın taläp itä.

Pänceşämbe tönendä qayber keşelär Dakkada “Prothom Alo” häm “Daily Star” kebek aldınğı gazetlarnıñ ofisların da kertep berniçä binağa ut törtte.