Berläşkän Millätlär Oyışmasınıñ Rasa diskriminaśiyäsen beterü komitetı ülemgä kiterä torğan höcümnärdän xökemgä tartılğan fälästinlelärgä ülem cäzasınıñ birelüenä röxsät itkän İzrailneñ yaña ülem cäzası qanunınıñ alarğa qarata ıruğ diskriminaśiyäsen däwam itterüen belderde häm anı tiz arada ğämäldän çığarırğa çaqırdı.
BMO Komitetı comğa könne yasağan belderüendä qanunnıñ keşe xoquqların citdi räweştä bozuına basım yasadı.
Mart ayında İzrail parlamentı qabul itkän yaña qanunğa kürä, yaw astındağı Yordannıñ Könbatış üzänlegendä xärbi mäxkämälär tarafınnan “terrorçılıq” qısalarında qabul itelgän ülemgä kiterüçe höcümnärne başqaru säbäbe belän xökem itelgän fälästinlelär ğadäti cäza bularaq ülem cäzasına xökem iteläçäk.
Komitetqa kürä, “yaña qanun 1962nçe yıldan birle İzrailneñ ğamäli bularaq däwam ittergän ülem cäzasına moratoriyne beterep häm ülem cäzasınıñ qullanu mäydanın kiñäytep keşe xoquqlarına bik zur zıyan kiterä”.
Berläşkän Millätlär Oyışmasınıñ Iruğ diskriminaśiyäsen beterü komitetı qanunnıñ “ğamäldä barı tik fälästinlelärgä genä qağılırlıq” üzençälektä buluın häm töğäyen xökem qararı çığarılğannan soñ ülem cäzaların ütäw öçen 90 könlek waqıt bilgelänelüen iskärtep uzdı.
18 bäysez belgeçtän toruçı komitet 182 taraf däwlätneñ Rasa diskriminaśiäseneñ barlık formaların beterü turında xalıqara konvenśiyägä tuğrılığın küzätä.
1969nçı yılda köçenä kergän konvenśiyä nigezendä däwlätlär ıruğ (rasa) diskriminaśiyäsen beterergä, diskriminaśiyägä kiterüçe ğamällärne yuqqa çığarırğa häm ıruğ, tös, näsel yäki milli yäisä êtnik kilep çığışına qarata diskriminaśiyäsez qanun qısalarında tigezlekne täêmin itärgä tiyeş.
İzrail 1979nçı yılda konvenśiyäne rasladı.
İzrail 1967nçe yıldan birle Yordannıñ könbatış üzänlegen yaw astında tota häm 2023nçe yılnıñ oktyabr ayında Ğazzägä başlatqan genośidçı suğıştan soñ töbäktä qırıslıq kübäyde.
