Törkiyä ilbaşı Räcäp Täyyip Ärdoğan Misır belän xezmättäşlekneñ töbäk totrıqlılığına öleş kertüen häm Änkaranıñ monı investiśiyälärdä häm säwdädä näticäle qullanırğa teläwen äytte.

Ärdoğan Qahirädä uzğan Törkiyä–Misır Êş forumınıñ yomğaqlaw utırışında: “İke yaqlı säwdä külämen 15 milliard dollarğa citkerü maqsatı qısalarında Misır ilbaşı Abdulfättäx äs-Sisi belän yaqın xezmättäşlegebezne däwam itäçäkbez”, — dide.

İlbaşı Ärdoğan Yuğarı däräcäle strategik xezmättäşlek şurası cıyılışında säwdä häm iq’tisadi mönäsäbätlärneñ centekläp qaraluın, mönäsäbätlärneñ nigezen nığıtaçaq häm barlıq ölkälärdä alarnıñ dairäsen kiñäytäçäk kileşülärgä qul quyıluın assızıqladı.

Ärdoğan säwdä küläme 8 milliard dollardan artqan Misırnıñ Törkiyäneñ Afrikadağı iñ zur säwdä partnyerı buluın iskärtep: “Misırnıñ iñ küp êksport başqarğan illäre arasında bez 7,4 % belän öçençe, iñ küp import başqarğan illäre arasında 3,4%lıq öleş belän cidençe urında torabız”, — dip belderde.

Ärdoğan säwdä ministrlarınıñ Yuğarı däräcäle säwdä kiñäşläşü mexanizmınıñ kiläse utırışın Änkarada ütkäräçägen äytte.

İlbaşı Ärdoğan Törkiyäneñ Misırnıñ törle tarmaqlarına yaqınça 4 milliard dollar külämendäge investiśiyäläreneñ  xäzerge waqıtta 100 meñ misırlını êş belän täêmin itüen dä  östäde.

Törek şirkätläreneñ yuğarı êksport quätenä iyä tarmaq  liderları buluın beldergän ilbaşı Törkiyä  podryadçiklarınıñ Misırda ğomumi bäyäse  1 milliard dollardan artıq bulğan 27 proyektnı üz östenä aluın äytte.

Ärdoğan şulay uq Misırnıñ  2030 nçı yılğa vizionı  qısalarında planlaştırılğan 14 yaña aqıllı şähär tözeleşendä Törkiyä  firmalarınıñ da qatnaşuına ömet belderde, Törkiyä êş dön’yasına  ışanıçı häm törek şirkätlärenä  yärdäm itüe öçen Sisigä räxmät äytte.

İlbaşı monnan tış, Törkiyäneñ tözeleş tarmağı texnologiyäläre häm standartların Misırnıñ êş köçe häm täcribäse belän berläşterüneñ Afrika häm Aziyädä zur külämle proyektlarnı uñışlı räweştä gamälgä aşırırğa mömkinlek biräçägen assızıqladı.