Törkiyä tışqı êşlär ministrı Xaqan Fidan İstanbulda Balkan illärennän kilgän wazıyfadaşları belän ayrım-ayrım oçraşular ütkärde.
Tışqı êşlär ministrlığı belderüenä qarağanda, Bosniya häm Gersegovina tışqı êşlär ministrı Êlmedin Konakoviç, Kosova tışqı êşlär ministrı Donika Gervalla-Şvars häm Albaniya tışqı êşlär ministrı Êlisa Spiropali belän uzdırılğan oçraşular comğa könne ütkärelgän ikençe Balkan tınıçlıq platforması cıyınınıñ östämä çaraları qısasında oyıştırıldı.
Fidan, şulay uq, Serbiya tışqı êşlär ministrı Marko Djuriç, Tönyaq Makedoniya tışqı êşlär häm tışqı säwdä ministrı Timko Mukunski häm Çernogoriya (Qarataw) tışqı êşlär ministrı Êrvin İbrahimoviç belän dä oçraştı.
Bosniya häm Gersegovina tışqı êşlär ministrlığı “X” sotsial’ çeltäre arqılı yasağan belderüdä Konakoviçnıñ Balkan tınıçlıq platformasın tormışqa aşırudağı role öçen Fidanğa räxmät belderüen häm oçraşuda global’ häm regional’ mäs’älälärneñ, ayırılğısız Bosniya häm Gersegovinadağı säyäsi wäzğiyätneñ qaraluın citkerde. Bosniya yağı oçraşunıñ ikeyaqlı mönäsäbätlärne häm regional’ totrıqlılıqnı nığıtuın assızıqladı. Monnan tış, Konakoviç Fidannı üz ilenä qunaqqa çaqırdı.
Kosova tışqı êşlär ministrı Gervalla-Şvars isä “Instagram” säxifäsendäge yazmasında, oçraşularda Kosovanıñ Awrupa Berlege häm NATOğa integratsiyase belän bäyle strategik yünäleşe, qurqınıçsızlıq, regional’ totrıqlılıq häm yaxşı kürşelek mönäsäbätlärendäge xezmättäşlekneñ qaraluın xäbär itte. Ul Törkiyäneñ daimi yärdäme öçen räxmät äytep, Änkaranıñ Balkannarda dialognı, tınıçlıqnı häm totrıqlılıqnı alğa sörüendäge rolenä basım yasadı.
Tönyaq Makedoniya isemennän belderü yasawçı Mukunski törek wazıyfadaşı belän uzğan oçraşularda ikeyaqlı mönäsäbätlär, iqtisadi xezmättäşlek häm investitsiya mömkinlekläreneñ qaraluın, ike ilneñ NATO berlektäşlege häm regional’ tırışlıqlarğa tuğrılığınıñ yañadan raslanuın äytte.
Albaniya tışqı êşlär ministrı Spiropali da oçraşuda Albaniya belän Törkiyä arasındağı strategik partnerlıqnıñ torğan sayın nığuın belderep, bu yıl êçendä öçençe yuğarı däräcäle ministrlıqlarara xezmättäşlek şurasınıñ cıyıluı planlaştırıluın äytte. Spiropali, şulay uq, Änkara häm Tiranada ütkärelergä tiyeşle NATO sammitlarınıñ ike berlektäş arasındağı xezmättäşlekne tağın da tiränäytü öçen möhim mömkinleklär tudıruın citkerde.
Serbiya tışqı êşlär ministrı Djuriç isä Fidan belän oçraşularda ikeyaqlı säyäsi dialognıñ, kön tärtibendäge töp mäs’älälärneñ häm regional’-global’ wäzğıyätneñ qaraluın äytte.
