Daniya watandaşlar belän ber rättän räsem häm tawışları parodiyalänüçe sänğatçelärne dä saqlawnı maqsat itep quya.
Kiläse yıl başında qabul iteläçäk qanun ölgese avtorlık xoquqı qanunına üzgäreş kertep, keşelärneñ räsem yäisä tawışların röxsätsez parodiyaläp, internetta urtaqlaşunı tıyaçaq.
Qanun ğamälgä kergän oçraqta daniyalelär fotoräsemnäre öçen avtorlık xoquqın alaçaq. Alar internetta röxsätsez urtaqlaşılğan materiallarnı alıp taşlawnı taläp itä alaçaq. Şul uq waqıtta qanun parodiya häm satira öçen röxsät biräçäk läkin monıñ niçek bulaçağı älegä bilgesez.
Êkspertlar häm räsmi zatlar Daniya qanunınıñ dipfeyk texnologiyase aşa taratıluçı yalğan mäğlümat belän köräşü öçen xökümät kürgän iñ kiñ qırlı çaralardan berse bulaçağın äytä.
“Latent Space Advisory” isemle konsultaśiya şirkäten qorğan häm generativ yasalma fähem ölkäsendä aldınğı êkspert bulğan Genri Ajder Daniya xökümäten qanunnarnı üzgärtü zarurlığın añlağanı öçen täqdir itüen belderep: “Keşelär miña dipfeyktan niçek itep saqlana aluların sorağanda alarğa bolay dip äytäm: “İnternettan çığıp kitüdän başqa yul yuq. Ämma bu mömkin tügel.”
Dipfeyk häm yalğan mäğlümat
AQŞ ilbaşı Donald Tramp may ayında dipfeyk belän ber rättän röxsätsez alınğan räsemnärne urtaqlaşunı tıyuçı ike partiya yaqlağan qanunğa qul quydı. Uzğan yılnı Könyaq Koreya dipfeyk pornografiyasen çikläw öçen qatıraq cäzalar häm sośial media platformaları öçen köçäytelgän qağıydälär kertte.
“Berär säyäsätçegä dipfeyk belän parodiya yasıy alasız ikän, ul da anı internettan alıp taşlıy almasa, bu wazğıyät bezneñ demokratiyane zäğıyflätäçäk,” - dip belderde Daniyaneñ mädäniyät ministrı sentäbr ayında uzğan yasalma fähem häm avtorlık xoquqı konferenśiyasendä.
Qanun barı tik Daniyadä genä ğamälgä keräçäk, häm sośial media qullanuçılarına qarata aqçalata yäisä törmä cäzası qaralmağan. Läkin mädäniyät ministrı äytüençä, dipfeyk videoların betermägän zur texnologik platformalar qatı ştraflar belän oçraşırğa mömkin.
Ministr beldergänçä Awrupa berlegeneñ çirattağı räise bulğan Daniyaneñ älege qanun täqdime Franśiya häm İrlandiya kebek başqa Awrupa berlege äğzalärendä qızıqsınu uyatqan.
