Törkiyä belän Azärbaycan ênergetika, säwdä, investiśiyalär häm turizm kebek ölkälärne üz êçenä aluçı häm 110 maddälek ğamäl planı bulğan 12nçe Urtaq iqtisadi komissiya protokolın imzaladı.
Kileşügä düşämbe könne Törkiyä ilbaşı urınbasarı Cäwdät Yılmaz belän Azärbaycan premyer-ministrı Ali Asadov Azärbaycan başqalası Baqıda qul quydı.
Törkiyä ilbaşı Räcäp Tayyip Ärdoğan häm Azärbaycan däwlät başlığı İlham Äliyev tarafınnan 2021 yılnıñ 15 iyun könne imzalanğan Şuşa deklaraśiyaseneñ mönäsäbätlärne berlektäş däräcäsenä kütärüen xäterlätkän Cäwdät Yılmaz xäzerge xezmättäşlekneñ berençe itep Törki däwlätlär oyışması tüşäme astındağı êşçänleklärne regional häm xalıqara däräcädä dä nığıtıp, bar törki dönya mullığına öleş kertüne maqsat itüen açıqladı.
Yılmaz bu añlayış belän Berläşkän iqtisadi komissiya cıyılışlarınıñ tögäl proyektlar citeşterü häm urtaq iqtisadi maqsatlarğa nıq adımnar belän atlaw öçen sxema täqdim itüen, xezmättäşlekneñ tabışlarğa äylänüen täêmin itüen citkerde.
İlbaşı urınbasarı süzlärenä qarağanda uzğan yılnı Azärbaycan belän säwdä küläme 8 milliard dollar buldı.
“Säwdä küläme öçen quyılğan maqsat – 15 milliard dollar. Asıl maqsatıbız – urtaq citeşterü, urtaq investiśiya häm öçençe illärdä urtaq proyektlar êşläw mömkinlegenä ireşü. Bez Xäzär diñgeze baylıqların Könbatışqa citkerüçe tranzit il bulmasqa tiyeş. Bez, ênergiya belän citäkläwçe, taläp qurqınıçsızlığı täêmin itelä torğan strategik üzäklär bulırğa tiyeş. Monıñ öçen ênergiyadağı xezmättäşlegebezne yañartıla torğan ênergiya çığanaqların da kertep törländerü zarur. Naxçıvan aşa planlaştırğan ênergiya koridorın mömkin qadär tizräk ğamälgä aşırıp, ênergetika ölkäsendäge berlektäşlegebezne nığıtırğa tiyeşbez. İke yaqlı mönäsäbätlärebezdä ikençe möhim xosus bulğan 21nçe ğasırnıñ Yefäk yulı dip ataluçı Urta koridor bügenge köndä moñarçı berdä bulmağanı qadär ähämiyät qazandı, bar iğtibarnı Könçığış-Könbatış liniyasenä yünältte,” – dide ul.
Cäwdät Yılmaz citkergänçä Böyek Qıtay diwarınnan Awrupağa suzıluçı säwdäneñ yazmışı Törkiyä häm Azärnaycannıñ qaqşamaz ittifaqı belän şäkel alaçaq.
