Törkiyä ilbaşı Räcäp Tayyip Ärdoğan comğa könne Törekmänstandağı xalıqara forumda çığış yasap Törkiyäneñ tınıçlıq häm dialog urnaştıruğa tuğrı qaluın belderde.

Aşxabadta uzğan Xalıqara tınıçlıq häm ışanıç forumında çığış yasağan Ärdoğan Törkiyäneñ üz tarixı, geografiyäse häm śivilizaśiyäse tudırğan cawaplılıq xise belän tınıçlıq häm dialog urnaştıru öçen bar köçenä êşläwen äytte.

 Ärdoğan şulay uq Törkiyäneñ utnı tuqtatu häm daimi tınıçlıqqa ireşü öçen diplomatik tırışlıqlarnı, şul isäptän Rusiya -Ukraina konfliktı belän bäyle iniśiativalarnı, xuplarğa äzer buluın belderde.

 İlbaşı Ärdoğan Yaqın Könçığış töbägenä dä tuqtalıp, tınıçlıq urnaştırunıñ barlıq êtaplarında fälästinlelär dä qatnaşırğa häm öleş kertergä tiyeşlegen assızıqladı.

 Törkiyä ilbaşı oktyabr’ ayında Ğazzädä İzrail belän “Xamas” arasında ireşelgän utnı tuqtatunıñ totrıqsız bulıp qaluına iğ’tibarnı yünältep, utnı tuqtatunı saqlap qalu öçen xalıqara yärdämne däwam itärgä çaqırdı.

 Törekmänstannıñ daimi neytral’lege

 İlbaşı Ärdoğan dön’ya iderları Aşxabadta cıyılğanda Törekmänstannıñ Neytral’lek monumentına çäçäklär salu tantanasında qatnaştı.

 Ärdoğan tantanada çaqırılğan däwlät häm xökümät başlıqları, şul isäptän Rusiya däwlät başlığı Vladimir Putin häm İran ilbaşı Mäsud Päşäzkiyan, belän bergä qatnaştı.

 Ärdoğan soñraq forum mäydançığında uzğan räsmi qarşı alu tantanasınnan soñ kümäk fotoräsemgä töşte.

 Liderlar könneñ ikençe yartısında çaranıñ açılış utırışında qatnaşaçaq.

 Aşxabadtağı forum Törekmänstannıñ daimi bitaraflıq statusınıñ 30 yıllığın häm BMO ğomum şurasınıñ 2025 nçe yılnı Xalıqara tınıçlıq häm ışanıç yılı dip iğ’lan itüen bilgeläp ütü öçen ütkärelä.