Yäkşämbe könne “PKK” barlıq qorallı köçlären Törkiyädän Tön’yaq Ğıyraqqa küçerüen belderde häm şulay itep Törkiyäneñ “Terrorsız Törkiyä” iniśiativasında möhim borılış küzätelde.
“PKK” Söläymaniyäneñ Kandil töbägendä yasağan belderüendä Törkiyä çikläre êçendäge barlıq êlementların çigenderü qararın tormışqa aşıruın citkerde.
Belderüdä terror oyışmasınıñ qorallı köçen häm êşçänlegen tuqtatu qararınıñ may ayında törmädäge liderı Abdullah Öcalan kürsätmäse nigezendä qabul itelüe äytelde.
Belderü yasalğan urında Törkiyädän kilüe belderelgän 23 “PKK”lı terrorçı da bulğan.
Törkiyä, AQŞ häm Awrupa Berlege tarafınnan terror oyışması dip tanılğan “PKK” 1980 yıllardan birle Törkiyädä meñlägän keşeneñ ülemenä säbäp bulğan terror kampaniyäse alıp bara.
Xakimiyättäge “Ğadellek häm üseş” partiyäse ğomum başlıq urınbasarı Äfkan Ala soñğı belderülär häm yasalğan adımnarğa qağılışlı terrorçılıqnı beterügä qarşı tağın ber möhim êtapnıñ tögällänüen belderep, “İlebezdä yıllar buyı boğaw bulıp torğan terrorçılıqnı tulısınça beterü belän yaña çornıñ işekläre açılaçaq” dip äytte.
“Ğadellek häm üseş” partiyäse süzçese Ömär Çälik “PKK”nıñ Törkiyädäge êlementları, şulay uq töbäktäge, ayıruça Ğıyraq belän Süriyädäge barlıq qorallı häm zakonsız strukturalarınıñ tarqatıluı häm qoral taşlawınıñ “Terrorsız Törkiyä” yul kartasındağı alğarışnıñ konkret näticäläre buluın belderde.
Ul bu iniśiativanı demokratiyäneñ barlıq qurqınıçlardan arındırıluı öçen yasalğan strategik häm tarixi adım dip atap, monı terror oyışmaları aşa imperialistik täêsir urnaştıruğa qarşı totış dip belderde.
Ömär Çälik ilbaşı Räcäp Täyyip Ärdoğannıñ yuğarı däwlät ixtıyarı häm Milli teläktäşlek, tuğanlıq häm demokratiya komissiyäse êşçänlekläre belän alıp barılğan bu prośessnıñ uñay näticälär birüne däwam itüen belderde häm Törkiyäneñ töbäktä totrıqsızlıq tudıru tırıqlıqlarına, şul isäptän prośessnı töp iğ’tibarınnan çitkä yünältüçe säyäsi, küzläw häm ğamäli sabotaj omtılışlarına cawap itep yul kartasın qatğıy räweştä ğamälgä aşıraçağın assızıqladı.
