Könyaq Koreyä Pxenyan belän Mäskäw arasındağı xärbi xezmättäşlekne iğtibar belän küzätüen belderde.
“Yonxap” xäbär itüençä, Könyaq Koreyä Tışqı êşlär ministrlığı tarafınnan bastırılğan belderüdä: "Bez Tönyaq Koreyä belän Rusiyä arasındağı xärbi xezmättäşlekkä qağılışlı waqiğalarnı iğtibar belän küzätäbez”, - diyelgän.
Belderüdä Berläşkän Millätlär Oyışması İminlek Şurası qararların bozuçı "Tönyaq Koreyä-Rusiyä xärbi xezmättäşlegen kiçekmästän tuqtatu çaqıruı qabat yasaldı.
Xökümät çığanaqları isä älegä Tönyaq Koreyädän östämä ğäskärilär cibärelüen raslawçı bernindi bilge dä açıqlanmağan, dip belderde.
Ukraina İlbaşı Volodimir Zelenskiy 25nçe iyüldä yasağan belderüendä Tönyaq Koreyäneñ Rusiyägä östämä 30 meñ ğaskäri cibärergä teläwen, şulay uq ballistik raketa oçırtu mäydançıqların da cibärergä äzerlänüen alğa sörgän ide.
Seul xökümäte Tönyaq Koreyäneñ bügengä çaqlı Rusiyägä yärdäm itü öçen yaqınça 20 мең ğaskäri häm xärbi injener cibärüen, şularnıñ yaqınça 14 meñeneñ front sızığında wazıyfa başqaruınıñ isäplänelüen farazlıy.
Şul uq waqıtta Tönyaq Koreyä tışqı êşlär ministrı Ço Son-xuêynıñ 19-20nçe iyüldä Mäskäwdä Rusiyä İlbaşı Vladimir Putin häm tışqı êşlär ministrı Sergey Lavrov belän oçraşuı ike il arasındağı xärbi xezmättäşlekneñ tağın da nığıy alaçağı turındağı farazlarnı arttırğan ide.
