Qotqaruçılar İndoneziyada cimerelgän mäktäp binası astında qalğan uquçılarğa kislorod häm su citkerde, alarnı qotqaru öçen irtänge säğätlärdä dä tırışlıq quydı. Bina cimerelgännän soñ 12 säğättän artıq waqıt ütkäç tä qotqaru êşläre däwam itte.
Kim digändä ber uquçı ülde, distälärçä keşe yaralandı häm 65 keşeneñ cimereklär astında qaluı farazlana.
Qotqaruçılar, poliŝiya köçläre häm ğaskärilär Sidoardjo şähärendäge “Al Khoziny İslam” internat mäktäbe cimerelgännän soñ 8 säğät ütkäç 8 keşene qotqardı.
Qotqaruçılar cimereklär astında başqa mäyetlärneñ dä buluın belderä, bu isä ülüçelär sanınıñ arta alaçağın kürsätä.
Uquçılarnıñ ğailäläre xastaxanälärdä yäisä cimerelgän bina yanında cıyıldı, balalarınnan xäbär kötte. Qotqaruçılar cimereklär astınnan ber yaralanğan uquçını çığarğanda yaqınnarı borçılıp qıçqırdı.
Internat mäktäp kompleksında qorılğan üzäk sişämbe irtä belän 65 keşeneñ yuğaluın citkerde. Uquçılarnıñ 12-17 yäştä buluı, 7-11nçe sıynıfta uqığan yegetlär buluı äytelde.
Qotqaru êşläre belän citäklägän Nanang Sigit äytüençä awır timer-betonnar häm cimereklär, şulay uq bina kisäkläre qotqaru êşlären qıyınlaştırğan.
“Bez cimereklär astında qaluçılarğa kislorod häm su citkeräbez, alarnı saqlap qalırğa tırışabız,” – dide Sigit.
Bina cimerelgän waqıtta uquçılar doga uqıy ide
Qotqaru êşlärendä yözlägän keşe qatnaştı, alar kislorod cihazları, mediŝina apparatları häm başqa kiräk-yaraqlar belän täêmin itte.
Vilayätneñ poliŝiya süzçese Djuls Abraxam Abast äytüençä, bina cimerelgän waqıtta uquçılar doğa uqığan bulğan. Bina röxsätsez räweştä kiñäytü êşläre barışında bulğan.
Mäxällä xalqı, uqıtuçılar häm administraŝiya xezmätkärläre yaralanğan uquçılarğa yärdäm kürsätte. Qız balalar binanıñ başqa öleşendä doğa uqığanı öçen isän qalğan.
Ber uquçı ülde, 99 uquçı yaralandı häm xastaxanägä salındı, alarnıñ qayberläre awır xäldä.
Binanıñ cimerelü säbäben tikşerälär. Abast äytüençä êlekke doğa uqu zalı ike qatlı bula läkin röxsätsez räweştä tağın ike qat östärgä tırışqannar.
“İske bina fundamentı tağın ike qatnı kütärä almıyça cimerelgän,” – dide Abast.
