İzrail matbuğatında basılğan xat özeklärenä qarağanda, däwlätneñ yuğarı däräcäle xärbi prokurorı xärbi totqınnar üzägendä İzrail ğaskärläreneñ Fälästin totqınına höcüm itüen kürsätüçe videoyazmanı taratuda cawaplı buluın tanıp wazıyfasınnan kitkän.

Bu waqıyğa İzrail säyäsätendä küp oçraqta uñçlarnıñ tänqıyt’lärenä duçar bulğan Tomer-Yeruśalmi isemle xärbi baş prokurornı bäxäs üzägenä quydı. Uñçılar anıñ bu ğamälen däwlätkä xıyanät dip bäyäli.

Xalıqara cämäğat’çelek tarafınnan İzrail xärbiläreneñ suğış cinayät’lärenä qarşı bik yomşaq buluda ğayeplängän Tomer-Yeruśalmi İzrailneñ çiktän tış uñçı säyäsi atmosferası häm Netanyaxunıñ säyäsäte arqasında xäräkät alanı tabuda qıyınlıqlar kiçerä ide.

Uzğan yıl İzrailneñ “Channel 12” telekanalında dön’ya kürgän   videoda İzrailneñ kön’yağında urnaşqan Sde Teiman qulğa alu üzägendä İzrail xärbiläreneñ Ğazzädän bulğan ber fälästinle totqınğa censi köç qullanu oçragı kürsätelä ide.

Comğa könne Tomer-Yeruśalmi üzeneñ wazıyfasınnan kitü xatında videonı taratuınıñ maqsatı armiyäneñ fälästinle saq astında bulğan keşelärneñ xoquqların İzrail xärbiläre xoquqlarınnan östen quya digän tänqıyt’lärgä qarşı çıgu dip beldergän.

İzrail matbuğatında basılğan xatta Tomer-Yeruśalmi bolay digän:
“Ber totqınğa qarata köç, qırıslıq qullanu şige bar ikän, armiya monı tikşerergä tiyeş. Qızğanıç, bu añlayış  iñ naçar totqınnarğa qarşı da êşlänmäskä tiyeş bulğan ğämällär bar digän çınbarlıq inde barısın da ışandıra almıy”.

Saqlanu ministrı İsraêl’ Kaś häm küp kenä İzrail säyäsätçeläre Tomer-Yeruśalmine wazıyfasınnan kitkännän soñ kisken tänqıyt’läde. Kaś anıñ kire wazıyfasına qaytarılmayaçağın häm videonı taratu turında qarar qabul itkän keşelärgä qarata tikşerülär däwam itäçägen belderde.

İzrailneñ Ğazzädäge suğışında, bigräk tä älege waqıyğa bulğan Sde Teiman üzägendä, fälästinle totqınnarğa qarata mönäsäbät keşe xoquqları oyışmaları tarafınnan naçar mönäsäbät dip bäyälänä.

Alarnı kümäk räweştä saq astına alalar häm aylarça ğayepläwsez yäki mäxkämäsez totalar.

İrekkä cibärelgän totqınnar törmä saqçılarınnan  daimi qıynawlar, azıq-tölek, su citmäw häm naçar şartlar turında belderälär.