“Sresan Pharma” çığarğan “Coldrif” daruında diyetilen glikolnıñ röxsät itelgän çiktän 500 tapqırğa küp buluı kürelde.

Bötendönya sälamätlek saqlaw oyışması Hindstanda daru qurqınıçsızlığındağı problemalarğa iğtibarnı cälep itte.

Töbäktäge yuğarı däräcäle ber poliŝiya räsmi zatı “Reuters”ka pänceşämbe könne birgän intervyuğa kürä Hindstan poliŝiyase Madya Pradeş vilayätendä kim digändä 17 balanıñ ğomeren özgän yütäl daruı şirkäte “Sresan Pharma”nıñ xucasın qulğa aldı.

5 yäştan keçkenä balalar soñğı ber ayda diyetilen glikol matdäse küp bulğan yütäl daruın êçkännän soñ yaqtı dönyadan kitte.

Uzğan pänceşämbe könne yasalğan ber testta daruda ximikatnıñ buluı bilgelände.

Yuğarı däräcäle ber poliŝiya räsmi zatı Tamil Nadu vilayätendä totılğan şirkät xucası S. Ranganatannıñ çärşämbe könne Çennaida qulğa alınuın häm mäxkämägä çığarılaçağın belderde.

Çindvara poliŝiyase mödire Adjay Pandey isä “Reuters”ka belderü yasap, Ranganatannıñ mäxkämä utırışınnan soñ üz vilayätennän Madya Pradeşnıñ Çindvara şähärenä küçereläçägen äytte.

Hindstan qanunnarına kürä daru citeşterüçelär här matdäne häm yasalğan darunı testtan uzdırırğa tiyeş.

Gambiya, Üzbäkstan häm Kamerunda Hindstanda yasalğan darular arqasında 10nan artıq balanıñ yaqtı dönyadan kitüennän soñ 2023 yıldan birle êksportlanuçı yütäl daruları laboratoriyalärdä xökümät mäcbüri räweştä bilgelägän östämä testlar aşa uza.

Hindstan räsmi zatları bu atnada şulay uq Gudjarat vilayätendä êşçänlek başqaruçı “Shape Pharma” häm “Rednex Pharmaceuticals” şirkätläre tarafınnan yasalğan häm şul uq ximikat quşıluı öyränelgän “Respifresh” häm “RELIFE” isemle ike cirle darunı qullanmaw mäs’äläsendä kisätü yasadı.

“Shape” häm “Rednex” mäs’älä belän bäyle añlatma taläplärenä cawap birmäde.

“Dönyanıñ daruxanäse” bularaq belenüçe Hindstan - AQŞ häm Qıtaydan soñ dönyanıñ öçençe iñ zur daru citeşterüçe ile.