İndoneziyadäge su basu häm cir şuışu afätläre räsmi zatlar beldergän sannarğa kürä 200dän artıq keşeneñ ğomeren özde.

Könbatış Sumatranıñ afät belän köräş agentlığı süzçese İlham Vahab comğa könne: “Bügen kiç 61 ülem terkälde, 90 keşene êzlilär,” – dide.

Tönyaq Sumatrada isä 116 keşe yaqtı dönyadan kitte, Açeh provinŝiyasendä ülüçelär sanı 35 buldı.

Afär belän idarä agentlığı başlığı Suharyonto monnan alda Tönyaq Sumatranıñ iñ küp zıyan kürgän provinŝiya buluın äytkän ide.

Afät belän köräş däwam itä, keşelärne êzläw êşçänlekläre aldında kirtälär bar. Alar arasında: zıyan kürgän yullar, ütep bulmaslıq cirleklär, tiskäre hawa şartları.

Küp urınğa haman da kerep bulmawın äytüçe räsmi zatlar ülüçelär sanınıñ arta alaçağına borçıla.

Ütep bulmastay cirlärgä hawa yulı belän yärdäm cibärälär.

Räsmilär cirle citäkçeleklärne êvakuaŝiya urınnarında sälamätlek saqlaw punktların, aş-su bülmälären qorunı tizlätergä çaqıra.